Mashtrimet e Tonin Marinajt, korrupsioni, klientelizmi e arroganca ndaj bizneseve pakësoi votat e PS në Malësinë e Madhe
Bilanci zgjedhor i 25 prillit, është prova e qartë dhe e plotë, që tregon se prej 6 vitesh në krye të kësaj krahine, ish-drejtori i pushtetit të PD në QSUT; ka vepruar si kryebashkiak i punëve të tij, i ortakëve në biznese e klaneve klienteliste, shoqërore e fisnore, duke e tjetërsuar Bashkinë në institucion punësimesh nepotike, qendër tregtare tenderësh, liçensash, privatizimesh, lejesh ndërtimi, ‘avullim’ taksash e… “pak trafiqe” matanë kufirit
Nësë në zgjedhjet e 25 prillit, PS-ja në Bashkinë Malësi e Madhe, nuk do kishte kontributin e deputetit Paulin Sterkaj dhe mbështetjen e tij të fortë nga banorët e zonës; pa asnjë dyshim që do kishte marrë edhe më pak vota nga sa mori faktikisht.
Edhe pse numri i mbështetësve të PS në Koplik, ishte më i lartë se më 2017 e 2019; në kuti kishte 580 vota më pak për këtë parti; pakësim që lidhet me zullumet e shumta që ka bërë prej 6 vitesh kryetari i Bashkisë Tonin Marinaj, etiketuar prej banorëve si “kryetar i interesave të veta”
Me këtë firo jo të vogël votash që ndikoi në humbjen e PS në Shkodër, socialistët e Malësisë së Madhe, i bënë të qartë Ramës, se nuk mund të sakrifikojnë e votojnë për sundimin, pasurimin dhe pazaret e xhambazit Tonin Marinaj.
Humbje votash në Koplik sidomos, u shkaktuan dhe nga sulmet e kryebashkiakut, me gjoba të qëllimta, bllokim punësh, taksa abuzive, me klientelizëm, kapadaillëk e arrogancë ndaj bizneseve të ndershme të zonës e investitorëve të mëdhenj; të cilët nuk pranojnë të derdhin “haraç” në xhepat e “krye-bajraktarit” Tonin Marinaj.
Kryeministrit Edi Rama, i janë dërguar ankesa e denoncime me fakte, nga pothuajse gjithë bizneset e Malësisë së Madhe, madje edhe investitorë të huaj energjie e qendrash turistike.
Ata që nuk ankohen për kryebashkiakun, janë biznesmenët shokë, familjarë, klientë e ortakë të tij, që ndajnë së bashku gjithë “tepsinë e tenderëve, licensave, leje ndërtuese e zhvilluese, projekteve, donacioneve, pasuritë lokale dhe fondet e ndihmës ekonomike me lista emërore false.
Nuk ka të vogël e të madh në Bashkinë Malësi e Madhe, që nuk i di aferat korruptive të Tonin Marinajt, por duke mos përmednur çfarë thuhet, po publikojmë disa nga faktet e pasqyruara në Raportin Nr. 73, datë 27.06.2020 të KLSH:
– Zhdukja e 49,682,860 lekë të reja, me korigjime e mos pasqyrim të dhënash financiare në “Llogaria 432- Tatime-Taksa viti 2019”.
– Dhënie 6,611,726 lekë të reja, paga tepër për shefat e sektorëve, ndërsa pas auditit që i konsideroi “vjedhje”, kryebashkiaku Marinaj nuk urdhëroi rikthimin e tyre në “Llogaria 423”.
– Në “Llogaria 468-Debitorë Biznese ndaj Bashkisë”, me urdhër të kryetarit Marinaj, nuk është mbledhur vlera 43,565,134 lekë të reja për 4 bizneset e tij e 46 biznese të tjera shokësh, drejtorësh e të fortësh; ndërsa në regjistër janë pasqyruar sikur i kanë paguar.
– Në “Llogaria 467-Kreditorë”, është bërë falsifikim e zhdukje 135,352,723 lekë të reja.
– Kryetari i Bashkisë, nuk ka miratuar kërkesën e Financës, për administrimin e pasurive aktive afatgjatë, ku vetëm për vitin 2019 munguan 3.9 milionë Euro detyrime për kontrata tokash, troje, terrene, pyje, kullota, plantacione, ndërtime, rrugë e vepra ujore, makineri etj. (faktet vazhdojnë).
Ajo çfarë nuk po bëhet, është mos fillimi i procedimit penal ndaj kryebashkiakut Tonin Marinaj, sipas të dhënave të këtij raporti të KLSH; por ndoshta vepron SPAK, sepse nuk flitet për vjedhje të 1 kompjuteri por për afro 12 milionë Euro në total.
FAKT/ Kështu u hesht dhe ndaj denoncimeve për punësime me ryshfet në vitet 2007-2008 gjatë pushtetit të PD, kur Tonin Marinaj ishte Drejtor Personeli në QSUT; por vetëm e shkarkuan, me motivin se kishte falsifikuar diplomën e shkollës së mesme e universitare./Pamfleti
