Pas “pastrimit të njollës” me qumështin pluhur; “Lufra” futet në “tepsinë” e tenderëve për çerdhe-kopshtet e Tiranës
Batërdia në fabrikat dhe punishtet e përpunimit të qumështit; do publikojmë denoncime e investigime me fakte nga krimi ushqimor, duke nisur me prova nga një firmë me emër lumi, ku përdoret vaji i palmës dhe përbërsi i rrezikshëm “Benzoat”, të cilët ulin koston e prodhimit si fitim për pronarët e shtojnë jetëgjatësinë false të produkteve në treg, por shkurtojnë jetën e konsumatorit , sidomos me pasojë dëmtimet e rënda te fëmijët.
Është shfaqur përsëri publikisht firma e përpunimit të qumështit “Lufra sh.p.k”, por këtë herë e futur në “tepsinë” e Bashkisë Tiranë, me një tender “të majmë”, për të furnizuar kopshtet dhe çerdhet e fëmijëve.
Sipas kontratës së firmosur me 25 maj 2021 dhe njoftuar në Buletinin e APP më 31 maj, rezulton se Lali Eri i ka dhënë firmës “Lufra shpk”, tenderin me vlerë 680 milionë lekë me TVSH, për Lotin nr. 2, pa harruar dhe Lotin nr. 1.
Gjatë gjithë vitit 2021, do ketë edhe 3 lote (tendera) të tjerë po me këtë vlerë e po për firmën “Lufra shpk”; të cilës siç duket, pas refuzimit në disa aplikime tenderësh, Lali Eri ia paska “testuar e pëlqyer” produktet dhe ka urdhëruar të përzgjedhet për të furnizuar kopshtet e çerdhet.
Në vendimin e tij, për t’i dhënë tendera me mirëbesim, pa fond limit e me vlerë të paracaktuar kontrate dhe pa garë; patjetër që Lali Eri e di se firma “Lufra sh.p.k”, do ta ketë “pastruar njollën penale” të qumështit pluhur në prodhim.
Ka qenë muaji shkurt 2015, kur sektori i krimit ekonomik i Policisë Qarku-Fier, kapi 1350 kg qumësht pluhur në mjediset e firmës “Lufra sh.p.k”, duke proceduar penalisht pronarin Arben Ndreko, me akuzën prodhim e falsifikim produktesh ushqimore dhe mashtrim me mallra importi pa faturë tatimore.
Gjersa është pranuar në tendera nga Lali Eri, i cili sic dihet, nuk lejon e nuk toleron asnjë shkelje ligji, patjetër që “Lufra sh.p.k” e ka hequr “njollën” e qumështit pluhur, shitur si qumësht lope.
Nuk duhet besuar, sepse siç thotë populli që ha produkte bulmeti sipas etiketës, vetëm qimja ndërrohet, ndërsa zakoni nuk harrohet; mbasi qumështi vërtetë është i bardhë, por me të bëhen edhe punë të zeza./Pamfleti
