Lindita Nikolla blen dy makina 100 milionë lekë tek Dulakët me paratë publike; Rama ‘qahet’ për krizë
Vetëm një muaj pasi Edi Rama e emëroi në krye të Kuvendit, Lindita Nikolla nuk ka vonuar shumë, duke iu kthyer tenderave të luksit dhe abuzivë, si në kohën kur ishte ministre e Arsimit; e vetmja ministre dhe kryeparlamentare në historinë e shtetit shqiptar me mesatare 5.9.
Ditët e fundit Lindita Nikolla ka finalizuar tenderin për blerjen e dy makinave për vete dhe administratën e Kuvendit me vlerë 100 milionë lekë, pra nga 50 milionë lekë secila, duke konkuruar kështu me makinë luksoze ish ministrin e Brendshëm, Sandër Lleshajn. Për blerjen e makinave, Nikolla ka kontraktuar kompaninë ‘Albania Motor Company’, e cila ka si objekt tregtimin e automjeteve.
Pas kësaj kompanië qëndron oligarku Artan Dulaku, një klient i hershëm i Edi Ramës, rrjedhimisht edhe klient i Erion Veliajt, të cilët në bashkëpunim vijojnë ngritjen e kullave në Tiranë.
Dulaku është gjithashtu një klient i Ogerta Manastirliut, nga e cila ka marrë rreth 4 milionë USD përmes tenderave me blerje autoambulanca.
Në rastin e Lindita Nikollës bien në sy vlera e lartë e makinës, rreth 50 mijë USD, në krahasim me institucionet e tjera. Krerët e bashkive dhe drejtorive, makinat i kanë blerë me një vlerë mesatarisht 30 milionë lekë. Duket se Nikolla ka marrë si referencë krahasuese makinën luksoze të Edi Ramës, e cila dyshohet se është marrë tek një trafikant droge.
Në një kohë kur Edi Rama dhe ‘Tigri’ kanë shpallur krizën energjetike, krizën e gazit, naftës dhe po lejojnë rritjen e çmimit të ushqimeve, rrethi i pushtetarëve ka nisur një aksion, duke zhvilluar tendera luksi për mobilim zyrash, ndërrim perdesh, blerje makinash, udhëzime dhe shpenzime të tjera të panevojshme.
Siç edhe ka konstatuar KLSH-ja me qindra herë në raportet voluminoze, zyrtarët e korruptuar sajojnë lloj-lloj tenderash të panevojshëm dhe korruptivë, për të ndarë dhe shpërdoruar paratë publike….
