Lajm i fundit: Policia e Shkodrës arreston autorin e vrasjes së 17-vjeçares dje në plazhin e Velipojës

Policia e Shkodrës ka zbardhur mbytjen e 17-vjeçares Enisa Doda, që ndodhi një ditë më parë në Velipojë, duke vënë në pranga një 25-vjeçar të dyshuar si të përfshirë në vdekjen e saj. 17-vjeçarja, e cila u gjet e pajetë 700 metra larg bregut të detit kishte shkuar për të pushuar në plazhin e Velipojës.
Rreth orës 14:00, së bashku me 25-vjeçarin Indrit Bajraktari, ata kishin marrë një motor uji me qira. Pas më shumë se 2 orësh, rreth orës 16:30, pronarët e motorit të ujit kanë ngritur dyshime mbi vonesën e çiftit, pasi motori ishte marrë me qira vetëm për 30 minuta. Ata kanë dalë në det për të gjetur motorin.
25-vjeçari, i cili kishte ardhur nga Anglia për pushime gjatë verës është gjetur duke notuar fshehtas në ujë. Ai është pikasur nga pronarët e motorit të ujit që e kanë pyetur se ku ishte vajza dhe motori. Dy orë më vonë, vajza është pikasur e mbytur nga një peshkatar. Indrit Bajraktari ka deklaruar para policisë se vajzën e kishte lënë në breg dhe e mori xhaxhai i saj.
Duke marrë shkas nga këto fakte, Policia tha se i riu nga Postriba, i cili kishte ardhur me pushime nga Anglia, është arrestuar për veprat penale “Shkaktimi i vetëvrasjes”, “Moskallëzimi i krimit” dhe “Veprime që pengojnë zbulimin e së vërtetës”, ndërkohë që vijon hetimi sesi ka ndodhur ngjarja në det që shkaktoi vdekjen e 17-vjeçares.