Nga Eglantina Mezini:
Sipas burimeve të Newsalbania.al të orës së fundit është zbuluar skema sistematike e vjedhjes së naftës bruto në një nga pikat e prodhimit të kësaj Kompanie. Jo vetëm është bërë ky zbulim, por janë kapur në flagrancë duke vjedhur me autobote në sektorin Visokë-Qafë Kash. “Specialistët” e vjedhjes në vend të pompimit të ujit sipas procesit teknik kanë pompuar naftë bruto. Sigurisht që kjo sasi më pas kalonte në pikat më të afërta të karburanteve kundrejt shumave të majme sipas “kontratës blerës-shitës”. Po sipas burimeve kjo skemë dyshohet se ka funksionuar prej një kohe të gjatë. Drejtori i ri i emëruar katër muaj më parë në krye të Albpetrolit Florjan Muçaj siç vihet re i ka mbledhur mirë “rrypat” e kontrollit dhe investigimit së bashku me Task-Forcën e Kompanisë. Në këtë operacion Albpetrol-it i ka ardhur mbështetje Drejtoria e Policisë Fier si dhe sektori i krimit ekonomiko-financiar. Tashmë autobotet dhe të dyshuarit në këtë aktivitet grabitës e kriminal ndodhen në ambjentet e komisariatit të Mallakastrës. Për shkak të opercionit që vazhdon nuk jepen emra dhe detaje të tjera, ndërsa Newsalbania.al mëson se është operacion i cili nuk ka ndodhur asnjëherë 10 vitet e fundit edhe pse opinioni publik dhe pjesa e shëndoshë e Kompanisë i dinë mirë hajdutët e brendshëm e të jashtëm të kompanisë Albpetrol sh.a në tre dekadat e fundit.