Presidenti i Kosovës Hashim Thaçi ka njoftuar mesditën e së premtes zbritjen e tij në aeroportin “Nënë Tereza”, përmes një njoftimi në rrjetin social Fb.
“Sapo kam zbritur në Aeroportin “Nëna Terezë” në Tiranë, ndërkaq, të dielën në mbrëmje do t’ju drejtohem me një fjalë nga zyra ime.
Ju uroj një fundjavë të qetë dhe mbetem me shpresë të plotë se ditët më të mira për Kosovën dhe kombin shqiptar i kemi përpara.
Gjithmonë i juaji, deri në fund, Hashimi”.
Kanë qenë këto fjalët që presidenti i Kosovës ka shkruar sot, ndërsa iu desh të kthej nga Austria, që do të shërbente si tranzit për vazhdimin e udhëtimit drejt SHBA, për të realizuar takimin e 27 Qershorit në Shtëpinë e Bardhë. Por me publikimin e deklaratës së Prokurorisë së Specializuar që njoftonte se Thaçi akuzohej për krime lufte, Presidenti i Kosovës e anuloi këtë takim. Për shkak të mbylljes së fluturimeve nga Prishtina, Thaçi shfrytëzoi Tiranën si për nisjen ashtu dhe për kthimin e tij.
Ndërsa nuk ka lënë të kuptohet nëse u nis po sot drejt Prishtinës, Thaçi ka saktësuar që në zyrën e tij do të jetë pikërisht të dielën, nga ku do t’u drejtohet edhe qytetarëve të vendit të tij.
Por gjatë kësaj kohe, gazetari Arian Çani, në emisionin “Zonë e lirë”, ka bërë të ditur se sipas burimeve të tij, presidenti Thaçi është ndalur në Vlorë, ku ka takuar Kryeministrin Rama.
“Dua t’ju them ndërkohë, po më vijnë lajme që në këto momente që po flasim, Hashim Thaçi, ngaqë nuk vinte dot, ishte mbyllur kufiri në Kosovë, me avion, nuk vinte dot nga Brukseli a Austria ku ishte, zbriti në “Nënë Tereza” në Tiranë dhe tani është duke takuar, gjatë momentit që po flasim ne, është në bisedime me Ramsin në Vlorë”, u shpreh Çani.
Nuk dimë nëse ky është një informacion i besueshëm, por kujtojmë se nga foltorja e kuvendit, Kryeministri Rama mbrojti në mënyrë të hapur kauzën e UÇK-së dhe drejtuesit e saj.
