“Repertori i tij është një simfoni e dashurisë dhe bukurisë njerëzore”, Gramoz Ruçi mesazh ngushëllimi për ndarjen nga jeta të Sherif Merdanit.
Kryetari i Kuvendit Gramoz Ruçi ka shprehur ngushëllimet për ndarjen nga jeta të “Artistit të Merituar” Sherif Merdani.
Ruçi thotë se Merdani ishte një këngëtar dhe artist i madh, me repertorin e tij që është një simfoni e dashurisë dhe bukurisë njerëzore.
“Sherif Merdani ishte një këngëtar dhe artist i madh, që i këndoi me dashuri jetës, dashurisë, nënës dhe gjithçkaje të bukur te njerëzit, shpirti dhe ndjenjat e tyre. Repertori i Sherif Merdanit është një simfoni e dashurisë dhe bukurisë njerëzore. Me artin e tij Sherif Merdani emancipoi artin, këngën dhe muzikën shqiptare. Për këtë kontribut emancipues, ky artist i madh vuajti dënime e sakrifikoi vite të tëra nga jeta e tij. Por këto vuajtje nuk ia ndrydhën talentin dhe nuk ia pakësuan fisnikërinë. Me këngët e Sherif Merdanit jemi rritur dhe ato do të vazhdojnë të frymëzojnë brezat e ardhshëm”, shkruan në mesazhin e tij Kryetari i Kuvendit, Gramoz Ruçi.
