Pjetër Trashaj i ‘ALB-Garden’ mashtroi me pyllëzimin e Lurës, korrupsioni që thau 45 mijë fidanët e pishave
Ndodh vetëm në Shqipëri. Kompani të cilat marrin paratë publike dhe nuk zbatojnë kontratat për shërbimin e kontraktuar, në vend që të ndëshkohen, vijojnë të marrin tenderë klientelistë dhe të paracaktuar. Kompania e pyllëzimit dhe gjelbërimit ALB-Garden, me pronar Pjetër Trashajn, është e skeduar për dështimin me zbatimin e kontratave.
ALB-Garden është pjesë e aferës së Ministrisë së Mjedisit me projektin korruptiv, gjoja për pyllëzimin e Lurës, dikur një nga trevat më të bukura të Shqipërisë, e kthyer në një zonë të shkretuar nga mafia politike e Tiranës.
Në vitin 2014, Ministria e Mjedisit shpalosi projektin për mbjelljen e 2 milionë fidanëve me pisha në Lurë. Për realizimin e pjesshëm të projektit, u lidh një kontratë e dyshimtë edhe me kompaninë ALB-Garden të Pjetër Trashajt.
Sipas kontratës, ALB- Garden duhet të mbillte mbi 45 mijë pisha. Siç ndodh zakonisht, Trashaj mori paratë, duke pretenduar se kishte mbjellë pishat.
U hapën ca gropa nga banorët e zonës dhe u mbollën ca fidanë të blerë me çmim të lirë që nuk i përshtateshin zonës malore. Shumica e fidanëve u thanë, pasi pishat nuk ishin për zona malore, ndërsa një pjesë mbetën ashtu të zbehta dhe në agoni, as të tharë dhe as në jetë. Ftojmë prokurorët të bëjnë një shëtitje nga Lura dhe të shikojnë se çfarë ka ndodhur me pishat, për të cilat janë hedhur qindra mijëra euro. Të shikojnë se ku janë sot 45 mijë pishat e Pjetër Trashajt, për të cilat mori paratë publike.
Të hapin letrat se kush e ka monitoruar zbatimin e kontratës dhe ka hedhur firmën për ‘punën e kryer’. Në vend të pishave ka vetëm gjurmë korrupsioni të Pjetër Trashajt dhe kupolës së Ministrisë së Mjedisit. Çuditërisht, pas këtij skandali, kompania ALB-Garden ka marrë të paktën edhe 25 tendera për pyllëzime dhe gjelbërime, me vlerë qindra mijëra euro. Tenderin e fundit me vlerë 250 mijë USD e ka marrë disa ditë më parë nga drejtoresha e parqeve në Bashkinë e Tiranës, Erinda Fino, me objekt drurë dhe shkurre dekorative. Po cilat janë mashtrimet e tjera me kontrata të ALB-Garden? Vijon…
