Konfirmohet me Koronavirus/ Ish deputeti i PS: Të bëjnë tamponin të gjithë ata që më kanë takuar!

Mbrëmjen e djeshme ish deputeti i PS Fatmir Toçi, ka bërë me dije se është i infektuar me Koronavirus.

Lajmin e bëri të ditur përmes një postimi në faqen e tij në Facebook, ku ndër të tjera shkruan se “pas disa hamendjesh e dyshimesh për shkak të një gjendje dobësie shëndetësore vendosi të bëjë provën e tamponit nëse kjo vinte nga prekja e sëmundjes së shekullit, Covid-19 dhe rezultoi pozitiv”.

Ai shton se edhe familjarët e tij i janë nënshtruar vetëkarantinimit, me qëllim mbrojtjen e jetës së të tjerëve dhe zbatimin e ligjit.

Postimi i plotë:

I PREKUR NGA COVIDI

Dua të njoftoj miqtë e mi, të afërmit dhe të njohurit e shumtë se pas disa hamendjesh e dyshimesh për shkak të një gjendje dobësie shëndetësore vendosa të bëj provën e tamponit nëse kjo vinte nga prekja e sëmundjes së shekullit, Covid-19.

Dhe rezultova pozitiv:

Pas kësaj, unë dhe familjarët e mi, edhe pse ata nuk rezultuan si unë të prekur, iu nënshtruam vetëkarantinimit, për të mbrojtur jetët tona dhe të të tjerëve, por dhe në zbatim të ligjit, transparencës e në emër të moralit qytetar.

Sot, 5 ditë pas jetës në karantinë i izoluar në shtëpi, vendosa t’u drejtohem intitucioneve të specializuara të kujdesit shëndetësor për ta ndjekur gjendjen time shëndetësore, me besimin e plotë në kujdesin dhe aftësitë e tyre profesionale e humane.

U bëj thirrje të gjithë atyre njerëzve që puna, shoqëria apo rastësia i ka bërë të kontaktojnë me mua këtë javën e fundit, të shkojnë e të bëjnë me domosdo provën e tamponit, për t’u siguruar se janë negativ, për të mbrojtur veten, familjet e tyre, të afërmit dhe gjithë shoqërinë tonë!

Duke besuar në mirkuptimin dhe vlërësimin e këtij njoftimi jo të këndshëm, ju ftoj të bëni të gjitha përpjekjet për vlerësimin dhe zbatimin e masave me rreptësi dhe rigorozitet për t’u mbrojtur nga kjo flamë, sepse unë që po e provoj ju garantoj se nuk është thjesht një lojë dhe as ekzagjerim i situatës, siç thuhet jo rrallë me mendjelehtësi të çuditshme dhe naive.

Lutem për ju të gjithë, miqtë e mi, që të mos ta provoni këtë situatë, por çdo gjë varet nga secili prej jush!