Presidenti Meta i jep shtetësinë shqiptare, këngëtarit të njohur.
Kosova prej shumë vitesh pret liberalizimin e vizave nga Bashkimi Evropian në mënyrë që të qytetarët e saj të lëvizin lirshëm në zonën Schengen.
Por, ky vendim nga BE ende nuk ka ardhur duke bërë që shumë prej qytetarëve të Kosovës të kërkojnë dëshpërimisht një alternativë tjetër për të udhëtuar pa nevojën e një vize.
Një nga zgjidhjet është marrja e shtetësisë shqiptare, pasi Shqipëria prej vitit 2010 ka marrë liberalizimin e vizave.
Përveç këtij fakti, ka edhe shumë të tjerë që për shkak të zvarritjes pa fund të dialogut Kosovë-Serbi për normalizimin e marrëdhënieve mes dy vendeve, zgjedhin shtetësinë shqiptare pasi pasaporta e Kosovës nuk u ofron shumë “garanci”.
Çdo vit presidenti i Shqipërisë, Ilir Meta firmos me qindra dekrete për dhënie shtetësie. Rasti më i fundit është dhënia e shtetësisë për këngëtarin e njohur të Kosovës, Sabri Fejzullahu.
“Në mbështetje të nenit 92, pika “c”, dhe nenit 93 të Kushtetutës, si dhe nenit 9, pika 7, e nenit 20,të ligjit nr. 8389, datë 5.8.1998, “Për shtetësinë shqiptare”, të ndryshuar, u jepet shtetësia shqiptare, me kërkesë të tyre, personave të mëposhtëm: 1.Sabri Hazir Fejzullahu; 2. Nerxhivane Islam Fejzullahu (Krasniqi); 3. Ermal Sabri Fejzullahu; 4. Ariana Fazli Fejzullahu (Cakiqi)”, thuhet në dekretin e firmosur nga Meta më 5 gusht.
