Këlliçi akuza qeverisë/ Unaza e Re vatra e vjedhjeve më të mëdha politike
Kryetari i Forumit Rinor të Partisë Demokratike, Belind Këlliçi, ka zhvilluar mbrëmjen e sotme një takim me të rinjtë e Unazës së Re bashkë me ekipin e Degës 16 të FRPD.
Këlliçi thotë se Unaza e Re është vatra e vjedhjeve më të mëdha politike, ndërsa ngre akuzat se vjedhjet e qeverisë kanë varfëruar vendin.
Ai premton se PD do të zerojë tarifave universitare për disa shtresa studentësh, do të lehtësojë barrën fiskale për sipërmarrësit e rinj dhe do të japë bursa sociale.
“Kjo është beteja jonë dhe e çdo shqiptari që jeton në kushtet e mbijetesës. Unaza e Re është vatra e vjedhjeve më të mëdha politike, projekti i së cilës do të na kushtojë 24 milionë euro për kilometër!
Vjedhje të tilla e kanë varfëruar vendin deri në mjerim.
Të rinjtë po largohen masivisht, prandaj angazhimet tona kanë në fokus të rinjtë:
Zerimin e tarifave universitare për të rinjtë që vijnë nga familje me të ardhura nën 64 mijë lekë në muaj,
Përgjysmimin e tarifave për studentët që vijnë nga familje me të ardhura mbi 64 mijë lekë në muaj,
Lehtësim i barrës fiskale për sipërmarrësit e rinj,
10 mijë praktika pune të paguara çdo muaj,
5000 bursa sociale.
Këto janë angazhimet tona. Më 25 prill fitojnë të rinjtë”, shkruan demokrati në rrjetet sociale.
