Papërgjegjshmëria e shqiptarëve dhe mashtrimi që bëjnë klinikat private duke shitur teste Covid-i false për ata që shkojnë për punësim sezonal drejt Greqisë, rrezikon mbylljen e kufijve me të vetmin shtet të BE-së me kufij tokësor.
Autoritet shëndetësore dhe ato lokale greke po fajësojnë emigrantët shqiptarë dhe palën shqiptare për mungesën e kontrolleve rigoroze si në kufi ashtu dhe në klinikat mjekësore.
Komisioni i specialistëve grekë ka udhëzuar lockdown total për Janinën dhe periferinë e Epirit, pas rritjes së ndjeshme të ngarkesës virale në rajon.
Në prag të vendimit qeveritar, Guvernatori i Periferisë, Alekos Kahrimanis, ka deklaruar se përveç disa rasteve të caktuara ku humbën kontrollin dhe nuk u respektuan masat, kryesisht përgjegjës për rritjen e të infektuarve në rajon janë pacientët shqiptarë.
Konkretisht, Kahrimanis ka deklaruar se: “Sot 50% e pacientëve në spitalet kundër covid-19 janë të ardhur nga Shqipëria, ndërsa pacientët në reanimacion dhe intubim janë të gjithë shqiptarë.
Kurimi i tyre në Greqi vendoset dhe miratohet nga ministria e Jashtme”, duke kaluar përgjegjësinë e të dhënave shqetësuese në afërsinë kufitare të zonës me Shqipërinë.
Ndërkohë, në gazetën greke “Protothema”, kryetari i Dhomës së Tregtisë së Janinës, Dhimitris Dhimitriu, deklaroi se, “pasagjerët shqiptarë kalojnë me teste false kufirin në Kakavijë, vijnë me autobusa deri në Delvinaki dhe pastaj lajmërojnë shoferin se nuk ndihen mirë.
Shoferët janë të detyruar t’i shoqërojnë në qendrat shëndetësore më të afërta, ku natyrisht testet dalin pozitivë me covid-19 e sipas rregullores, do të kurohen në Greqi”.
Madje, si për t’i hedhur benzinë zjarrit, Dhimitriu i pyetur përse shqiptarët preferojnë kurimin në Greqi, thekson për gazetën se “politika e shtetit shqiptar kundër koronavirusit është jo-ekzistente.
Çdo gjë funksionon normalisht, pa asnjë kontroll dhe rastet e rënda thjesht u jepet oksigjen dhe izolim në shtëpi. Të drejtë kanë që kërkojnë kurim në Greqi”.