Ish-Presidenti Ilir Meta e ka zgjedhur tashmë, avokatin që do të ketë në krah për ta mbështetur në SPAK dhe zbuluar të gjithë të vërtetën dhe ata që fshihen pas përgojimit të emrit të tij si ish-bashkëpunëtor i Sigurimit të Shtetit. Ai quhet Genc Gjokutaj, avokat, ish-prokuror, analist i mprehtë i zhvillimeve politike.
Ilir Meta, aktualisht kryetar i PL, është shfaqur në një fotografi duke shtrënguar duart me z. Gjokutaj dhe bën këtë njoftim sot:
“Një ditë pas kallëzimit penal për anëtarët e Autoritetit të Dosjeve, ndërmorra sot hapin tjetër të radhës të caktimit të z.Genc Gjokutaj, avokat dhe ish-prokuror i njohur, për të ndjekur ligjërisht këtë çështje në funksion të një procesi të rregullt ligjor, por edhe transparent para të gjithë qytetarëve shqiptarë.
Jam i bindur në diskreditimin e plotë të këtij manipulimi dhe falsifikimi ndër më të rëndët në historinë e pluralizmit politik. Falsifikatorët do të përballen me të gjithë forcën e ligjit!”
