I sekuestruan pasuritë/ Adriatik Llalla: Prokuroria duhej të niste hetim edhe për Ramën dhe Veliajn
Ish-Kryeprokurori Adriatik Llalla në një intervistë televizive, ka thënë se prokuroria duhej të hetonte edhe për raste të tjera kur bie fjala për mosjustifikimin e pasurisë. Ndër të tjera ai ka thënë se nuk ndihet i kërcënuar apo i trembur, duke shtuar se nuk ka frikë askënd.
Pjesë nga intervista tek Cim Peka Live:
Pyetja: Nëse nuk keni frikë askënd, pse nuk keni nisur hetimet për të njëjtën çështje për kryeministrin Rama, kryebashkiakun Veliaj sepse i keni pasur të dhënat e deklarimit të pasurive të tyre. Veliaj e ka të paktën me dyfishin e vlerës, apartamentin që ka blerë. Rama ka deklaruar se ka blerë tokë me 2 mijë lekë të vjetra, sot po flasim për një pronë milionash. A ndiheni përgjegjës që shikoni se jeni në këtë situatë dhe nuk keni filluar hetim për këta zyrtarë të lartë që qartësisht nuk e justifikojnë çmimin e tregut për kohën kur janë blerë?
Llalla: Nëse do të ndiqej kjo praktikë që është ndjekur me mua sot, pra të dënohesh për një deklarim që ti e ke bërë në përputhje me ligjin, kontrata në përputhje me ligjin, vetë subjektet kanë bërë, dokumentuar përpara noterit me vullnetin e tyre të plotë. Është një marrëveshje mes palëve dhe nuk ka arsye për të filluar hetim. Por nëse do të hapej sot, siç ka filluar rasti im, prokuroria është e detyruar të nisë hetimet për cilindo, përfshirë edhe ata që përmendët ju.