Durrës/ 430 mijë pulat e ngordhura nuk janë groposur. A janë çuar për sallam e mish në treg?
Pse AKU nuk u lejua ta mbikëqyrte këtë rast?/ Fillimisht, pronarët e mbajtën të fshehtë për dy javë gjersa zhdukën gjurmët, pastaj, në pazar me shefat e Ministrisë së Bujqësisë u bënë analiza fiktive, duke falsifikuar shkakun e ngordhjes nga “Grip Shpendësh” në “Laringotrakeiti”, mirëpo dhe për këtë lloj sëmundje, pulat duheshin asgjësuar e groposur 10-15 kilometër larg qendrës së banimit, me komision katër-palësh e filmim të krejt procesit.
Ministresha e Bujqësisë, Frida Krifca, vartësit e saj qendror e rajonal të veterinarisë dhe biznesmenë pularie, janë autorë të një skandali me pulat e ngordhura në Durrës, për të cilat nuk bëjnë asnjë sqarim konkret publik, paçka se e detyron ligji “Për Veterinarinë”.
Janë bërë vetëm 3 mashtrime, për të fshehur të vërtetën:
– Para 13 ditësh, në 2 komplekse që kontrollohen nga e njëjta dorë biznesi, kanë ngordhur 430 mijë pula, ndërsa pronarët dhe kupola e Ministrisë së Bujqësisë e kanë mbajtur të fshehtë.
Pasi e fshehta doli në media, kupola e Ministrisë së Bujqësisë u bë palë me pronarët, duke deklaruar ngordhje të disa pulave, pastaj ka raportuar për 30 mijë krerë e një ditë më pas deklaroi 130 mijë krerë, ose 300 mijë më pak se shifra reale.
– Veterinerët shtetëror e privatë që monitorojnë këto komplekse, raportuan në ministri, se shkak i ngordhjes masive të pulave ishte “Gripi i Shpendëve”, por pas pazareve që bënë shefat e ministrisë me bosët e pularive, u deklarua se gjoja shkak ishte “Laringotrakeiti infektiv”, pa rrezik për konsum vezësh e mishi.
Por skandali thellohet më tepër, kur mëson se 430 mijë pulat e ngordhura në Durrës nuk janë groposur, ndërsa ministria nuk ka raportuar përse nuk janë groposur e çfarë është bërë me to, që sipas standardit të peshës minimale 1 kg./copa, bëhet fjalë për 430 ton pula të ngordhura, ose 20 trajlera me ngarkesë nga 23 ton secili.
Ku janë zhdukur pulat e ngordhura?
Sepse Ministria e Bujqësisë, Autoriteti i Ushqimit, Instituti Veterinar, Instituti i Shëndetit Publik dhe shefat E. Bregu, M. Zeqaj e L. Seraj të pulari-vezëve “R..” e “O…” në Durrës, nuk kanë raportuar për groposjen e tyre apo për hedhjen nëpër përrenj e lumenj, siç kanë vepruar kur u kanë ngordhur nga 10-15 pula.
Organet anti-krimit ekonomik e ushqimor, madje dhe SPAK, duhet të hetojnë pistën e përdorimit dhe shitjes së këtyre pulave për sallam e mish në treg, mbasi që Neni 80 i Ligjit Nr. 10465, datë 29.9.2011 “Për shërbimin veterinar”, detyron groposjen e tyre.
Kjo bëhet menjëherë pas ngordhjes dhe ekzaminimit të shkakut, 10-15 kilometër larg qendrës së banimit, në prezencë të një komisioni katër-palësh e me filmim e arkivim të krejt procesit.
A është zbatuar ky detyrim ligjor? A ka Ministria e Bujqësisë krematorium për kafshë e shpendë të infektuara? A ka përcaktuar pushteti lokal vendin e groposjes së 430 ton pula të ngordhura? Përse Autoriteti i Kontrollit Ushqimor u përjashtua nga mbikëqyrja?
Këtë ta zbulojë drejtësia, nëse pulat e ngordhura janë bërë sallam e kremviçe të “Hako”, “Natyral” apo ndonjë firmë tjetër; ndërsa “Pamfleti” mes informacioneve, ka dhe këtë fakt: Këto ditë firma “DM.ORGANIK Shpk” e ortakëve të pularisë e vezës “R…” kanë patur shumë punë me therrje pulash.
Madje për marifete të tilla me pulat e sëmura, më 21 mars 2015 para zgjedhjeve lokale, janë vlerësuar nga bashkëfshatari i tyre Ilir Meta e ish-ministri Edmond Panariti, me certifikatën: “Cilësi dhe siguri e lartë mishi e vezësh”. Kaq për sot….
