Rrapi i Palasës
Palasa është një nga vendbanimet e krahinës së Bregut të Sipërm, ku bëjnë pjesë edhe Dhërmiu, Vunoi, Himara, Piluri, Kudhësi dhe Qeparoi. E vendosur buzë Jonit, përgjatë shpatit perëndimor të malit, midis Qafës së Llogarasë dhe Dhërmiut, ky fshat i bashkisë Himarë dallon për gjelbërimin e përhershëm të bimësisë natyrore, kopshteve, agrumeve dhe ullinjve. Ndërkohë midis tyre veçohet edhe një monument natyre krejt i veçantë. I tillë është rrapi shekullor i Palasës, një pemë e vjetër me një trung me trashësi të konsiderushme dhe kurorë masive. I vendosur në pjesën e sipërme të fshatit, pranë kishës së ‘’Shën Dhimitrit’’, ai përbën jo vetëm një pjesë të historisë së këtij vendi, por edhe një atraksion turistik për tu vizituar. (I. Gj. Palasë, 26 korrik 2024)
