Ndërron jetë ikona e stomatologjisë shqiptare, nuk e fiton dot betejën me sëmundjen.
Mësohet se një tjetër figurë e rëndësishme në Durrës është ndarë. Në moshën 75-vjeçare ka ndërruar jetë stomatologu Mit’hat Peku, i cili vuante prej kohësh nga një sëmundje e rëndë.
I lindur në Shkodër më 26 korrik 1945, Peku u bë i njohur që në rininë e hershme në qytetin e Durrësit, kur ishte pjesë e ekipit të Lokomotivës në basketboll për meshkuj.
Më pas, i riu Peku do të fokusohej në studimet e larta, në Fakultetin e Mjekësisë, ku u diplomua për Stomatologji në vitin 1970. ky profesion që do ta shoqëronte Mit’hatin gjithë jetën, madje ai do t’ia trashëgonte atë edhe vajzës së tij, Ingridit.
Për rreth 8 vite, ai punoi me përkushtim në profesionin e tij në Burrel. Më pas do të zhvendosej në Shijak, ku ofroi shërbimet e tij për 5 vite me radhë për qindra banorë të qytezës së vogël.
Stacioni i fundit do të ishte qyteti i Durrësit, ku për shumë vite me radhë punoi si stomatolog pranë spitalit rajonal, poliklinikës dentare dhe më pas në klinikën e tij private.
