Me nderime të larta është përcjellë sot Kastriot Shehdadi, ish zyrtar për Informim në komunën e Gjakovës dhe ish gazetar shumë vjeçar në mediume të ndryshme në Kosovë e Shqipëri.
Në ceremoninë e varrimit, të organizuar nën patronatin e kryetarit të komunës së Gjakovës Ardian Gjini, morën pjesë shumë qytetarë, kolegë e miq Kastriotit, të cilët së bashku ndanë dhimbjen për humbjen e hershme të të ndjerit.
Në fjalën e tij para të pranishmëve, kryetari i komunës së Gjakovës Ardian Gjini, e ka çmuar lartë veprën dhe kontributin e Kastriot Shehdadit, duke shtuar se me Kastriotin ishin miq që nga fëmijëria, për të vazhduar duke qenë bashkëpunëtorë deri në ditën e sotme. Ai e ka vlerësuar Kastriotin si një profesionist, fjalëpakë por mjaft voluminoz në kryerjen e detyrave dhe obligimeve të veta.
Fjalë miradije për personalitetin dhe përkushtimin, por në të njëjtën kohë edhe dhembje e pikëllim për humbjen e tij, kanë thënë edhe miqtë e bashkëpunëtorët e tij, veterani i gazetarisë nga Gjakova Musa Kurhasku, gazetari nga radio Tirana Jaho Margjeka dhe miku e gazetari nga Gjirokastra Engjëll Serjani, të cilët thanë se vdekja e Kastriotit është humbje e madhe jo vetëm për familjen, por edhe për gazetarinë shqiptare, miqtë dhe bashkëpunëtorët e tij të shumtë. Ndërsa, në emër të familjes Shehdadi, të pranishmin i ka falënderuar vëllai i të ndjerit Lekë Shehdadi.
Ndryshe, i ndjeri Kastriot Shehdadi për afër 20 vjet ka punuar në Zyrën e Informimit në komunën e Gjakovës, ndërsa për shumë vite tjera ka qenë edhe gazetar në disa medium në Kosovë dhe në Shqipëri.
