NA PIKELLOVE ZEMRAT MIK GRIGOR JOVANI Kurrsesi s'doja ta besoja se zoti do të merrte kaq shpejt pranë vetes miku im i hershëm Grigor Jovani.
Ikja jote e parakohshme më la në pikëllimin të thellë. Jemi njohur që në adoleshencën e hershme përmes të magjishmes poezi, kur ne të kishim idhull. Të kam patur redaktorin e parë të poezive të mija që në Nëntorin e 1978.
Për afro 50 vite ruajtëm një miqesi të pastër. Ndonëse plaga e thellë e emigracionit na ndau fizikisht, shpirtërisht kurrsesi. “Ymer vëllai” me shkruaje dhe ashtu herë përmes bisedave në skype e herë me mesazhe çmalleshim duke kujtuar kohë të bukura.
Sot lajmi i kobshëm se nuk je më mes nesh më pikëlloi. Nuk doja ta besoja. Miq të shumtë tuaj, jo vetëm nga Laçi ynë, por nga mbarë vendet e botës që të njohën përmes poezisë bashkëkohore dhe elegante si rrallë poet u ndjenë të pikëlluar dhe shprehin dhimbjen e thellë përmes shkrimeve në rrjetet sociale.
Nuk do ta harroj kurrë bisedën që bëmë mbrëmjen e 7 prillit 2023 kur të kërkova për të realizuar një intervistë për një jeteshkrim për ta përfshirë në një libër që kisha menduar ta shkruaja për disa nga personalitetet e artit, kulturës, sportit e shkencës që lanë gjurmë në Kurbin.
“Do jetë nder për mua, aq më shumë kur e bën ti. Laçi është atdheu im. në një kohë kur do më shërbejë edhe si ndihmesë psikologjike, pasi këto kohë po jap një betejë me kancerin”.
Më theri në shpirt kjo, por ja, pas afro dy vite betejë s’doja ta besoja se nuk je më mes nesh.
Lamtumirë poet me dy atdhe. U prehsh në paqe mik i pa harruar.
