Gazeta Austriake ‘Die Presse’ ka dalë në përfundimin se marrëveshja mes Kosovës dhe Serbisë në Uashington, kishte për qëllim të ndihmonte presidentin e SHBA-ve, Donald Trump, në fushatën për zgjedhjet presidenciale të 4 nëntorit. Në shkrim, Die Presse thekson se amerikanët kishin vendosur në marrëveshje edhe fjalinë për njohje reciproke, por e hoqën pas kërkesës së presidentit serb, Aleksandër Vuçiç.
Pjesë nga shkrimi i Die Presse:
Fjalia për ‘njohje të ndërsjellë’, që mikpritësit e kishin vendosur fillimisht në marrëveshje, thuhet se u fshi pas protestave të forta nga Beogradi.
Sipas raportimeve nga Prishtina, kërcënimi i ish-kryeministrit Ramush Haradinaj për të lënë qeverinë nëse Hoti nënshkruan një dokument që konfirmon pretendimet serbe ndaj liqenit të Gazivodit në veri të Kosovës, shkaktoi trazira në delegacionin e Kosovës.
Për Trump, i cili po ashtu njoftoi njohjen e Kosovës nga Izraeli dhe zhvendosjen e ambasadës serbe në Jerusalem, nuk është vendimtare aq shumë përmbajtja e saktë e marrëveshjes sesa ‘municioni’ për fushatën zgjedhore.
Interesi i ri i SHBA për projektin në ndërtim të Kosovës mund të zbehet përsëri: pas zgjedhjeve në SHBA, BE me sa duket do të luajë përsëri rolin e ndërmjetësit pa mirënjohje, në dialogun e ashpër mes fqinjëve të padëshirueshëm.
I besuari i Trump, Grenell nuk ishte i interesuar për përmbajtjen e marrëveshjes, deklaroi ish-kryeministri i Kosovës, Albin Kurti në pranverë, pasi u rrëzua me ndihmën e SHBA.
Pas dy ditësh takime, dje u arrit marrëveshja mes Kosovës dhe Serbisë. Me ndërmjetësimin e Donald Trump, Kosova dhe Serbia, firmosën veç e veç në Shtëpinë e Bardhë për Normalizimin Ekonomik. Pas kësaj marrëveshje kanë pasuar edhe reagime të shumta. Hoti është shprehur se të hënën do të zhvillojë një takim me Vuçiç, dhe se kjo nuk është përfundimtarja. Haradinaj dhe Mustafa përcollën urimet e tyre për këtë marrëveshje, ndërsa të njëjtën gjë bëri edhe kryeministri Edi Rama. Po ashtu për marrëveshjen kanë reaguar edhe presidenti i Shqipërisë Ilir Meta dhe kryedemokrati Lulëzim Basha.
