Policia ka ndërhyrë sërish pas mesit të natës së djeshme për të shuar protestën e “Shqipëria Bëhet” dhe drejtuesit të saj, Adriatik Lapaj.
Ata kanë shembur çadrën dhe kanë shpërndarë protestuesit.
Në një video të publikuar në rrjetet sociale dëgjohen thirrje të protestuesve e veçmas grave e vajzave të pranishme që janë traumatizuar nga ndërhyrja e ashpër e policisë.
Në këtë aksion është raportuar se është lënduar edhe drejtuesi i lëvizjes “Shqipëria Bëhet”, Adriatik Lapaj.
Sipas informacioneve paraprake, ai dyshohet se ka pësuar dëmtime në kokë, të shkaktuara nga një bombol gazi.
Pas incidentit, në vendngjarje është thirrur ambulanca dhe Lapaj është transportuar drejt spitalit për të marrë ndihmën e nevojshme mjekësore.
Protesta e lëvizjes “Shqipëria Bëhet” kishte nisur më 8 dhjetor dhe zhvillohej pa ndërprerje përpara Kryeministrisë.
Ndërkaq, pasditen e sotme në po të njëjtin vend pritet të mblidhen mbështetësit e Partisë Demokratike dhe asaj të Lirisë, në vijim të asaj që është quajtur si “Foltorja 2”.
Kreu i grupit parlamentar i PD, Gazment Bardhi, nëpërmjet një statusi në FB, lajmëroi dje se sot në orën 18:00 rikthehet Foltorja e PD-së në sheshin përpara kryeministrisë.
Si çdo të hënë tashmë, kjo foltore do të jetë e para për këtë vit.
“Vendos qytetari, jo pushteti! E hënë, datë 5 Janar, ora 18:00, përballë Kryeministrisë”, shkruan Bardhi.
