Fjalimi i Ramës, analistët e shohin si të përulur, në kërkim të elektoratit gri
Analistët shohin ndryshim të kursit në fjalimin që mbajti të martën kryeministri Edi Rama para deputetëve socialistë. Për Alfred Lelën, kryesocialisti u shfaq reflektues dhe i përulur.
“Mu duk një kryeministër që ka qeverisur me arrogancë sipas meje dhe në fjalimin e djeshëm u paraqit i përulësi, një ndryshim 180 gradë nga arroganca në përulësi duke i kërkuar popullit shqiptar edhe njëherë besimin pavarësisht të metave. Mu duk se z. Rama ka mbetur pa alternativë”, tha Lela.
E këtë fakt analisti Lela e lidh me procesin e zgjedhjeve. “Qartësisht ishte fjalimi hapës i fushatës elektorale për zgjedhjet parlamentare të 2021”, tha Lela.
Ndërsa, Neritan Sejamini shprehet se kryesocialisti përmes fjalimit të tij kishte për qëllim të bindte elektoratin që është ende i pavendosur.
“Kishte një element të rëndësishëm në fjalimin e kryeministrit. Ai tregoi se Partia Socialiste ka vendosur që të hapet ndaj publikut të gjerë për të marrë kandidatura për deputetë. Ai po mundohet që të tërheqë përfaqësues apo kandidatë për deputetë nga elektorati gri”, tha Sejamini.
Për këtë, Rama i paralajmëroi të zgjedhurit socialistë se asnjë nuk e ka një vend të sigurt në listat e kandidatëve për zgjedhjet e ardhshme parlamentare.
“Askush pa përjashtim nuk e ka të garantuar vendin në skuadër”, u shpreh kryeministri në përfundim të mbledhjes së grupit parlamentar të PS në Elbasan.
