Ndahet nga jeta, në moshën 82 vjeçare mësuesi dhe intelektuali i spikatur i qytetit të Patosit, Z. Toli Shabani.
Toli Shabani lindi në 10 Janar 1939 në Frashër. Në vitin 1956 mbaroi shkollën pedagogjike në Tiranë dhe punoi si mësues në shkollën fillore të Sheqishtes. Në vitin 1964 kreu studimet në Institutin e Lartë Pedagogjik “Luigj Gurakuqi” Shkodër në degën gjuhë shqipe dhe letërsi. Deri në vitin 1985 punoi në shkollat 8-vjeçare të fshatrave Ngjeqar, Kurjan, Strum, Suk e Frashër. Në vitet 1985-1990 ka qenë drejtor i Pallatit të Kulturës Patos. U kthye sërish në arsim në vitin 1990 në gjimnazin e Patosit dhe punoi deri sa doli në pension në 10 Janar 1994. Ndonëse i vjetër në moshë, mësues Toli punoi me të njëjtin pasion dhe përkushtim me nxënësit në shkollën jopublike “7 Marsi” deri në vitin 2013.
Për vlerat e tij të shquara në fushën e arsimit dhe kulturës është dekoruar dy herë nga Kuvendi Popullor me medaljen “Naim Frashëri”.
Bashkia Patos i ka akorduar titullin “Mësues i Talentuar” me motivacionin “Për kontribut mbi 50 vjet në zhvillimin dhe përparimin e arsimit në rrethin e Fierit, veçanërisht në Patos”
Ndër breza mësues Toli do të kujtohet për kontributin e tij cilësor në jetën dhe veprimtarinë social-kulturore në gjithë territorin e Bashkisë Patos.
