Prej 5 vitesh, firma “Devolli” nuk paguan 2 milionë Euro/vit akcizë për birrën “Peja”; ja si falsifikon në doganë e tatime
Edhe gjatë aksionit tatimor në gusht 2019, vetëm distributorët “Devolli” nuk u kontrolluan/ Sipas raport-bilancit të Ministrisë së Financave, rezulton se këtë vjedhje fiskale po e realizon me falsifikim letrash doganore të sasive që eksporton e të letrave të shitjeve, duke u lejuar nga vetë shteti shqiptar, ndërsa 30% të lëngjeve, miellit e qumështit të ambalazhuar, i ka fshehur me gjoja bamërësi që ka bërë në 12 bashkitë veri-lindore, nëpërmjet distributorit “Kuindis”
Burime nga Ministria e Financave, kanë bërë me dije për “Pamfleti”, se edhe në bilancin fiskal 2020 të bizneseve kosovare, që importojnë produkte ushqimore, në regjistrin fiskal mungon birra “Peja” dhe 2 produkte të tjera qumësht e lëngje, të kompanisë “Devolli Group” që tregtohen në Shqipëri.
Dy “duar të forta” qeveritare në Kosovë e Shqipëri, që kanë lidhje interesash me pronarin e kësaj kompanie, Blerim Devolli, kanë lejuar të futen prodhimet e saj në tregun shqiptar, por nuk e kanë futur në regjistrin fiskal të doganave e tatimeve, sipas kapaciteteve që sjell.
Kjo veprimtari evazioni, ka vijuar qysh nga muaji janar 2015, por është zbuluar për herë të parë në muajin gusht 2017 nga KLSH, në kontrollet e regjimit të importit të mallrave të akcizës, sektori pije alkolike e jo alkolike.
Në listën mallrave të kësaj kategorie, mungon vetëm birra “Peja” me kod tarifor “NU 22030001”, si import shumice me distributor filialin “Kuindia shpk”; referuar dhe Proces-verbalit të Kontrollit Aposterior nr. 433, datë 18.12.2015, ku u konstatua se nuk deklarohet sasia e plotë e importit për aktivitet tregu, por vetëm si sasi për përdorim vetiak e bamirësi.
Në muajin shtator 2017, prokuroria e Shqipërisë, nisi hetimet referuar raportit të KLSH dhe faktit, se edhe gjatë viteve 2013-2014, rezultonte sikur birra “Peja” nuk futej fare në tregun shqiptar, me pasojë evazionin 2 milionë Euro në vit, humbje për doganat e tatimet këtu.
Me një “dolli birre”, prokurori Adriatik Llalla, brenda 10 ditësh e fshiu dosjen penale “Devolli-Peja”, për gjoja mungesë provash, ndërsa doganat e tatimet “rilindëse”, u betuan se nuk do ta lejonin më firmën “Devolli Group”, të fuste birrën “Peja” pa paguar taksat e akcizës së importit e detyrimet tatimore.
Mirëpo sipas regjistrave që ka Ministria e Financave, rezulton se birra “Peja” vazhdon të futet “lumë” në Shqipëri, duke mos paguar akcizën e detyrueshme ligjore, me marifetin se gjoja prodhohet nën sasinë 200 mijë h/litra.
Kujtojmë, se 3 muaj pasi nisi hetimi, paguante 36 lekë/litër për akcisë, përsëri me mashtrimin sikur fabrika e prodhimit ishte në Shqipëri e jo në Pejë-Kosovë; duke shmangur taksën 70 lekë/litër plus tarifat doganore.
Prej 4 vitesh, firma “Devolli” fut në Shqipëri 5-6 milionë litër birrë “Peja”, por në pazar me doganën kosovare e shqiptare, raporton sikur për Shqipërinë prodhon e eskporton vetëm 150-180 mijë litër; duke mos paguar miliona Euro akcizë në vit.
Mashtrimin e firmës “Devolli” e konfirmon Shkresa nr. 19437/2. prot. datë 15.10.2015 e Doganës Kosovë dhe Shkresa nr. 27663/2. prot. datë 20.11.2018, sipas të cilave, fabrika “Peja” prodhon mbi 200 000 h/l”.
Dega e Doganës Tiranë, me Vendim nr. 300, datë 02.06.2017 ka deklaruar mos pagesën nga birra “Peja” në vlerën 390,993,704 lekë të reja akcizë, ndërsa me dy akt-bilancet Nr. 58 e nr.138 për vitet 2016-2019, ka kanstatuar se nuk ka paguar 689, 432.256 lekë të reja akcizë.
Vetëm gjatë vitit 2020, referuar bilancit faktik doganor që nuk pasqyrohet, në Shqipëri janë futur 4 milionë 931 mijë e 964 litër birrë “Peja”; ndërsa sipas rregjistrave zyrtarë të deklaruar, rezulton se janë futur vetëm 1.4 milionë litër, të cilët janë taksuar me 36 lekë/litër alkoolmetrik, nga 70 lekë që e detyron ligji.
Këtë mashtrim e dinë dhe kryeministri Rama, drejtoritë e hetimit doganor e tatimor dhe seksioni i krimit ekonomiko-financar në Prokurorinë e Përgjithshme.
Por e lejojnë, ngaqë zëdhënës e negociues menaxhimi tregu i kompanisë “Devolli” në Kosovë e Shqipëri është Baton Haxhiu, këshilltari i kryeministrit Rama.
NË VIJIM/ Do publikojmë të plotë, skenarin e bosit Blerim Devolli, në vitin 2016 e 2019, bërë me policinë anti-krim, për të penalizuar dhe shkatërruar fabrikat e qumështit në Shqipëri, me qëllim krijimin e monopolit në treg për qumështin e tij “VITA” i cili rezulton me “Aflatoksinë” e përbërës kimik, por dhe për lëngjet./Pamfleti
