Asambleja Parlamentare e Këshillit të Evropës ka nxjerrë raportin mbi procesin zgjedhor të 25 prillit në Shqipëri.
Mes të tjerash, në raportin e hartuar prej tyre për procesi elektoral, evidentohen rastet për blerje votash, për të cilat kërkohet që hetimet të shkojnë deri në fund.
“Delegacioni i Asamblesë shprehu shqetësimin e tij në lidhje me pretendimet për blerjen e votave nga partitë politike, të cilat ishin të përhapura gjatë fushatës.
Ai vuri në dukje se një numër hetimesh u hapën për këtë çështje. Prandaj, delegacioni i Asamblesë pret që autoritetet përkatëse shqiptare të marrin masat e duhura, rastet të hetohen dhe të ketë informacione për rezultatet në kohën e duhur”, thuhet ndër të tjera në raport.
Si shqetësim serioz, Asambleja e KiE konsideroi edhe databazën me të dhënat personale të qytetarëve që u publikua disa ditë para zgjedhjeve.
Blerja e votave në zgjedhjet e 25 prillit është përmendur edhe në raportet e deritanishme të publikuara nga OSBE/ODIHR, ndërsa ambasadorja amerikane në Tiranë, Yuri Kim, ka kërkuar hetimin e rasteve. Opozita e drejtuar nga PD e ka cilësuar 25 prillin si një masakër zgjedhore, ndërsa ka deklaruar se nuk do të njohë rezultatin.
Në anën tjetër Kryeministri Edi Rama flet për certifikim të zgjedhjeve nga ndërkombëtarët, ndërsa Kolegji Zgjedhor nuk pranoi provat e paraqitura nga opozita për të 12 qarqet e vendit, duke lënë në fuqi shpërndarjen e mandateve nga Komisioni Qendror Zgjedhor dhe nga KAS.
