Erion Isai “bën humor” dhe me “verdhushkat”, i jep 4 miliardë firmës AGI KONS
Humoristi Erion Isai, që për ironi të fatit rezulton të jetë edhe kryetar bashkie i Kolonjës, duket se ka filluar të bëjë humor edhe me paratë e popullit. Edhe ai, ashtu si shokët e tjerë në pushtet, ka filluar të japë tendera të majmë tek “olgarkët” e Rilindjes.
Rasti më i fundit është ai i një tenderi me numër reference REF-81503-12-09-2020 dhe me objekt “Rrjeti shpërndarës i furnizimit me ujë në 14 fshatrat e Kolonjës, Bashkia Kolonjë”. Erion Isai ka shpallur fituese firmën AGI KONS të drejtuar “de facto” nga Gentian Sula për një vlerë prej rreth 4 miliardë të vjetra me TVSH.
Në tender kanë marrë pjesë vetëm 2 firma (bashkime kompanish), ku ndonëse firma tjetër (bashkim firmash) ka ofruar rreth 500 milionë lekë të vjetra me TVSH më pak se AGI KONS, përsëri kjo nuk është marë në konsideratë. Gjithashtu shikohet se vlera fituese është thuajse e njëjtë me vlerën e fondit limit, çka bën të lindin dyshime tepër të forta se gara nuk ka qenë aspak reale dhe se fituesi AGI KONS ka qenë i paracaktuar.
