Flamingot dhurojnë spektakël në Pishporo
Flamingot, zogjtë lozonjarë që tërheqin vizitorët me piruetat e tyre, kanë gjetur oazin e tyre të qetësisë në ligatinat e plazhit të Pishporos, në Fier.
Përveç Nartës dhe parkut kombëtar Divjakë-Karavasta vitet e fundit flamingot janë të pranishme edhe në Pishporo.
Fotjon Prençe, shef i Monitorimit në Administratën e Zonave të Mbrojtura në Fier, tha sot për ATSH-në se “prej tre vitesh kemi prezencë të kolonisë së flamingove (Phoeniopterus roseus) në Rezervatin Natyror të Pishporos. Qetësia e krijuar dhe ushqimi që gjendet në liganitat e Zonës së Mbrojtur ka bërë që këta shpendë elegantë dhe lozonjarë dhurojnë spektakël”.
Sipas tij, flamingot janë kthyer në një atraksion për turizmin e vëzhgimit të tyre në habitatet natyrore ku jetojnë.
Flamingot jetojnë gjithmonë në grupe, që nga grupet e vogla deri në qindra mijëra. Zogjtë ngrihen në ajër në grup dhe fluturojnë me qindra kilometra gjatë periudhës së shtegtimit. Fluturimi bëhet duke formuar radhë të gjata ose në formë V-je, derisa të arrijnë në vendmbërritjen e tyre – një liqen me ujë të kripur, që është vend i shkëlqyer për të ngritur folenë e për të rritur të vegjlit.
Zakonisht qindra flamingo mblidhen së bashku si një grup baleti uji. Të gjithë pastrojnë puplat e tyre rozë duke qëndruar me një këmbë në diell për orë të tëra. Madje me një këmbë ata edhe flenë.
Gjatësia e tyre shkon nga 81 deri në 130 cm, por pesha e tyre trupore është e vogël, ajo shkon nga 2–3,6 kg. Duke kombinuar peshën dhe ngjyrën, flamingot janë ndër zogjtë më të dallueshëm nga të tjerët.
