Skandal në Spitalin Rajonal të Shkodrës, mbetjet spitalore hidhen në koshat e mbeturinave të qytetit…
Ndonëse ligjet shtetërore flasin qartë për trajtimin me shumë kujdes të mbetjeve spitalore të rrezikshme, kujdesi në monitorimin e kontrollit që duhet ushtruar në zbatimin e plotë të procesit është inekzistent në Spitalin e Shkodrës. Mbetjet hidhen në kontenierët e mbeturinave të qytetit pranë Urgjencës dhe përballë Maternitetit të Shkodrës çdo mëngjes përpara ndërrimit të turnit të infermierëve (hedhja bëhet nga vetë infermierët e turnit).
Ky është skandali më i rrezikshëm i papërgjeshmërisë shtetërore, Ministrisë së Shëndetësisë dhe drejtuesve të spitalit. Ndërkohë që të gjithë e dimë rrezikun e këtyre mbetjeve në përhapjen e sëmundjeve infektive, ligjet shtetërore janë kopsitur aq mirë në trajtimin me shumë kujdes të tyre.
Pas interesimit tim në lidhje me këtë situatë totalisht të papërgjegjshme dhe shumë të rrezikshme për masën e gjërë të qytetarëve, burime pranë spitalit më bënë të ditur se tenderi për trajtimin e mbetjeve spitalore nuk është hapur nga Ministria e Shëndetësisë, e cila ka tagrin e tendereva spitalorë.
Në Shkodër ekziston autoklava (dhomë presioni për të kryer procese industriale që kërkojnë temperaturë të lartë dhe presion të ndryshëm nga presioni i ajrit të ambientit. Autoklavat përdoren në aplikimet mjekësore për të kryer sterilizim) e cila ka dalë jashtë funksionit duke mos arritur të kryejë proceset e sterilizimit.
Firma e trajtimit të mbetjeve që ka fituar tenderin e mëparshëm për trajtimin e mbetjeve e ka mbaruar kontratën e cila nuk i është rinovuar. Sipas burimeve pranë spitalit të Shkodrës, m’u bë e ditur që kontrata me firmën ka mbaruar diku në fund të qershorit. Drejtuesit e firmës së kontraktuar sapo kanë ‘nuhatur’ se rinovimi i kontratës nuk do bëhet pasi tenderin e rradhës do e fitojë një tjetër firmë, ka ndalur çdo proces pune në menaxhimin e mbetjeve spitalore (këto janl informacioneve të siguruara nga burime në spital, jo kontakt me firmën). Firma kontraktuese ka patur në menaxhim edhe autoklavën për t’u kujdesur në raste defektesh etj.
Ky është shteti i Rilindjes që kujdeset për imazh e fasada në rrjetet sociale, por nëse gërmon vetëm pak në brëndësi të tij, sheh kalbësira korruptive e papërgjeshmëri të nivele të larta nga koka e deri tek drejtuesit më të vegjël të institucioneve.
Skandali i hedhjes së mbetjeve spitalore në koshat e mbeturinave të qytetit të Shkodrës është skandali më i madh i papërgjeshmërisë shtetërore, sidomos kur bëhet fjalë për rrezikshmërinë që ato paraqesin për jetën e qyterarëve dhe dëmet mjedisore.
Pamjet dhe fotot janë dëshmia më e qartë se çdo institucion shtetëror është kalbur deri në rrënjë, sepse pushteti absolut është në kulmin e dëlirit të një qeverie e cila prodhon skandale nga më të ndryshmet në përditësinë e qeverisjes arrogante, të papërgjeshme dhe korruptive të saj.
I bëj thirrje Ministrisë së Shëndetësisë, drejtuesve të spitalit të Shkodrës të marrin masa urgjente në ndalimin e mëtejshëm të hedhjes së mbetjeve spitalore të rrezikshme në kontenierët e qytetit. Spitali si institucion shërben për të mbrojtur e për t’u kujdesur për shëndetin e qytetarëve dhe jo për të rritur rrezikun e pasojave të rënda shëndetësore që mund të kenë banorët vetëm për shkak të papërgjeshmërisë së të gjitha hallkave shtetërore që jetën e qytetarit duhet ta kenë prioritet të punës së tyre të përditshme.
Pamjet dhe fotot s’kanë nevojë për asnjë koment të shtuar përveçse për ndërhyrje urgjente në ndalimin e menjëhershëm të këtij skandali që po i serviret Shkodrës çdo ditë, prej muajsh.
