Nga: M.Ç
Fjalimi i Edi Ramës gjatë prezantimit të Drejtorit të Përgjithshëm të Policisë, nuk ishte nga ato homelitë e zakonshme propagandistike.
Rama pranoi se në shumë drejtime kishte rënie të standarteve, madje madje, edhe kthim mbrapa. E gjithë përgjegjësia për shumë gjëra që nuk kanë shkuar mirë, sipas kryeministrit, është e Gledis Nanos.
Shefi i qeverisë, nuk u kujdes fare ta maskojë këtë qendrim akuzues. Ishte i drejtpërdrejtë, madje shpesh i vrazhdë.
Rama la fare qartë të kuptohet, se Gledis Nano, Drejtori i shkarkuar i Policisë, është përgjegjës për shtimin e policëve të inkriminuar.
Sipas Ramës, Gledis Nano është përgjegjës për ngjarjen tragjike të Himarës ku humbi jetën vajza 7-vjeçare, pasi e përplasi me skaf një oficer policie.
Gledis Nano, tha Rama, është fajtor për kanabizimin. Kryeministri ngriti tonet kur u shpreh se Ardi Veliu e la territorin të pastër, pa asnjë bimë kanabis, ndërkohë që parcelat lulëzuan me drejtorin që ishte në detyrë deri pak ditë më parë.
Madje, bëri edhe ironi, kur tha se ai nuk pranonte provat që sillnin partnerët italianë që monitorojnë territorin.
Po Gledis Nano është përgjegjës në sytë e Kryeministrit, për ndërtimet e shtuara pa leje. Ai la të kuptohet se përfitues prej paligjshmërive të toleruara, ka qënë pikërisht ai, kur u shpreh se gjërat kanë ndodhur për shkak të tarafeve që ka marrë shefi, ose shefi i shefit.
Edi Rama ka vënë nën akuzë ish-drejtorin e Policisë, edhe për rastin e Ervis Martinajt, dhe veçanërisht për mënyrën se si ajo çështje është trajtuar në publik.
Kush e ka penguar drejtorin të fliste për këtë rast, tha Rama, i cili i kërkoi shefit të ri të uniformave blu, Muhamet Rrrumbullaku, që ta sqarojë sa më shpejt këtë çështje, nëse Ervis Martinaj është vrarë, apo jeton, dhe duhet kapur e dërguar para drejtësisë.
Kryeministri u paraqit sot në mbrëmje si turist që nuk ka lidhje me vendin, dhe se ai vetëm konstaton. Çdo gjë që ka shkuar keq, me krimin në rritje, dhe me abuzimet në çdo drejtim, e kanë bërë të tjerët.
Konkretisht, për 10 muaj që Shqipëria ka marrë tatëpjetën, fajin e ka pasur sipas Edi Ramës, një njeri i vetëm, pikërisht Gledis Nano./Syri.net
