Ka ndërruar jetë në moshën 91-vjeçare shkrimtari i mirënjohur Nasho Jorgaqi.
I lindur në Fier në vitin 1931, autor i dhjetra novelave dhe tregimeve për fëmijë, Jorgaqi është skenarist, hulumtues dhe studiues, i nderuar me titullin “Mjeshtër i Madh i Punës”.
Ai la pas një sërë botimesh letrare, skenarë filmash, përkthime dhe botime shkencore.
Disa nga veprat e tij janë “Dashuria e Mimozës”,” Ëndrra dhe plagë”, “Tomka”, “Antologji e mendimit estetik shqiptar”, “Larg dhe afër”, “Mërgata e qyqeve”, “Estetika e fjalës shqipe”, “Portrete dhe gjurmime” etj. Po ashtu ai ka studiuar veprimtarinë letrare të Nolit me veprën “Udhëtim me Fan Nolin”.
Një nga veprat më të debatuara ka qenë edhe libri më i njohur i tij, “Mërgata e Qyqeve”. Vepra e botuar në vitet 1970 i referohet mërgatës shqiptare dhe mbështetësve të mbretit Zog, dhe ka personazh qendror një agjent të ish-Sigurimit të Shtetit.
Homazhet për shkrimtarin e njohur do të mbahen ditën e premte në orën 11:00.
