Marrë nga Portali JOQ:
Një ngjarje e rëndë ka tronditur Spitalin Rajonal të Dibrës ditën e djeshme pasi drejtoresha e këtij institucioni, Irini Shehu, në një denoncim ekskluziv për JOQ u zbulua se ka sulmuar fizikisht ekonomistin e spitalit, Shaban Uklala, duke e goditur me kapëse letrash në ballë.
Një burim nga spitali ka rrëfyer për JOQ Albania:
“Ekonomisti i spitalit ka shkuar në zyrën e Shehut për të pyetur se përse ende nuk janë shpërndarë pagat, kur jemi tashmë në mes të shkurtit. Në vend që të jepte sqarime, drejtoresha e ka ofenduar rëndë një ditë më parë dhe e ka goditur në ballë me një kapëse letrash. Ai ka plagë të qepura dhe ndodhet nën kujdesin e mjekëve. Situata ka dalë jashtë kontrollit, por policia nuk ka marrë asnjë masë.”
Duke qenë se drejtorit të Policisë së Shtetit Ilir Prodës i shkojnë 7-të nga Belinda Balluku, psikopatja Irini endet e lirë me kapëse letrash në dorë gati për t’i çarë ballin kujtdo që nuk i siguron votat e Diasporës për Ballukun.
“Policia kriminalistike ka ardhur në spital, por askush nuk e di çfarë provash kanë marrë. Denoncimi nuk është pranuar, sepse Irini Shehu ka mbështetje të fortë politike nga Belinda Balluku. Kjo nuk është hera e parë që ajo keqtrajton punonjësit, por askush nuk guxon të flasë publikisht. Edhe tenderët e spitalit janë një çështje skandaloze, por askush nuk guxon të hetojë.
Thuhet se ekonomistit i është thënë se nuk do të ketë paga pa sjellë votat e diasporës. Është e qartë se po luhet një lojë e pistë me rrogat tona. Jemi familjarë, kemi kredi dhe fëmijë për të ushqyer, nuk mund të presim tekat e një drejtoreshe që mendon vetëm për interesat e saj.”
Ironikisht, Irini Shehu dikur ka kandiduar për deputete nën siglën e Partisë Demokratike, por sot mbrohet nga pushteti aktual. Kjo ka sjellë reagime të forta në Dibër, ku shumë qytetarë e shohin këtë si një shembull të pastër të hipokrizisë dhe korrupsionit politik.
