Vrasje në Dibër! Një 27-vjeçar i identifikuar si Gentian Kosiqi ka ndërruar jetë pasi është plagosur nga shoku i tij Rifat Xhelishi, 18 vjeç. Ngjarja ka ndodhur pak pas mesditës në orën 14:45, në vendin e quajtur “Malet e Obokut” në Maqellarë. 18-vjeçari Xhelishi ka plagosur nga pakujdesia me armë zjarri shokun e tij, i cili ka humbur jetën në spital.
Xheleshi pasi kishte qëlluar pa dashje shokun, kishte zbritur në fshat për të kërkuar ndihmë që të transportonin Kosiqin drejt spitalit. Por për shkak të terrenit të vështirë, ndihma mjekësore është vonuar dhe i riu ka humbur jetën për shkak të gjakderdhjes.
Ndërkohë që Policia dhe grupi hetimor kanë shkuar në vendngjarje dhe kanë arrestuar 18-vjeçarin në Komisariat, ndërsa vijon puna për zbardhjen e plotë të rrethanave të ngjarjes. I riu po merret në pyetje nga efektivët e Policisë së Shtetit në Komisariat.
Nga banorët e zonës, bëhet me dije se dy të rinjtë ishin shokë dhe nuk ishte hera e parë që dilnin për gjah. Madje jo më larg se sot, ata kishin dalë në qendër të fshatit për t’u takuar rreth orës 11:00 dhe më pas ishin ngjitur bashkë në mal.
Ndërkohë një rast i ngjashëm ka ndodhur më 26 nëntor në qytetin e Bulqizës, ku mbeti i vrarë Elidon Basha, 22 vjeç, teksa kishte dalë për gjueti me mikun e tij. Për ngjarjen u plagos Klodian Kola, i cili ndryshoi disa herë versionin e tij të ngjarjes. Kola fillimisht pretendoi se e kishte qëlluar ai shokun e tij, më pas u shpreh se të dy i kishin qëlluar të tjerë.