Policia e Shtetit ka nisur procedimin penal për dy motrat Lalo, të cilat akuzohen se kanë përhapur informacione të rreme për mjeken e QSUT-së, Migena Qato. Siç edhe njoftohet në informacionin zyrtar, ndaj dy motrave që denoncuan dje lidhur me vdekjen e babait të tyre, Rifat Lalo, ka nisur hetimi për të sqaruar edhe rrethanat e ngjarjes.
“Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke. Punohet për sqarimin e rrethanave të ngjarjes. Materialet i kaluan Prokurorisë së Rrethit Gjyqësor Tiranë, për veprime të mëtejshme,”-shkruhet në njoftim.
Dje dy motrat dolën në ekranet e mediave dhe denoncuan se babai i tyre nuk kishte marrë shërbim mjekësor nga stafi i spitalit Infektiv, por ishte lënë në një karrige. Më tej, ato rrëfyen se i ati para se të vdiste iu kishte treguar se në spital s’i kishin bërë as skanrin, ndaj edhe nuk nguruan të bënin thirrje: Mos i sillni të afërmit në spital! Pak pas prononcimeve të tyre në media, nuk vonoi as reagimi nga Qendra Spitalore Universitare “Nënë Tereza”. Spitali pretendon se Lala ka shkuar në spital në gjendje të rëndë dhe se i është bërë skaneri vetëm 45 minuta pas hyrjes. QSUT thotë se familjarët i kanë bërë presion mjekes roje, Migena Qato, për ta nxjerrë pacientin nga spitali e për ta kuruar jashtë vendit. Për të lexuar të plotë gjithë çfarë ka ndodhur dje.
NJOFTIMI I PLOTË:
Tiranë/ Arrestohen në flagrancë 6 shtetas, për vepra të ndryshme penale. Nga specialistët e Seksionit për Hetimin e Narkotikëve u bë arrestimi në flagrancë i shtetasit E. D., 22 vjeç, pasi në bulevardin “Bajram Curri”, gjatë kontrolli fizik dhe kontrollit të mjetit me të cilin ky shtetas qarkullonte u gjet një sasi me lëndë të dyshuar cannabis sativa. Specialistët për Hetimin e Krimit në Komisariatin e Policisë Nr. 1 bënë arrestimin në flagrancë të shtetasve:
•B. L., 31 vjeç, pasi në Rrugën e Elbasanit ka kundërshtuar me dhunë, për shkak të detyrës, punonjësit e policisë së rendit publik.
•D. S., 43 vjeç, pasi ka ushtruar dhunë fizike dhe psikologjike ndaj bashkëshortes së tij dhe fëmijëve të tyre të mitur, të cilëve iu plotësua kërkesë-padia për lëshimin e menjëhershëm të urdhrit të mbrojtjes.
Nga specialistët për Hetimin e Krimit në Komisariatin e Policisë Nr. 2 u bë arrestimi në flagrancë, për veprën penale “Mashtrimi”, i shtetasit M. I., 28 vjeç, sepse me datë 26.01.2021, me anë të mashtrimit, ka marrë me qira një mjet dhe nuk ia ka kthyer më shtetases I. J. Specialistët për Hetimin e Krimit në Komisariatin e Policisë Nr. 5 bënë arrestimin në flagrancë të shtetasit Sh. Ç., 36 vjeç, pasi në Kamzë, ka ushtruar dhunë fizike ndaj vëllait të tij. Nga specialistët e Qarkullimit Rrugor u bë arrestimi në flagrancë i shtetases G. Xh., 28 vjeçe, pasi u kap duke drejtuar mjetin në gjendje të dehur në masën 0.58 mg/l.
—–
Specialistët e Komisariatit të Policisë Nr. 4 filluan procedimin penal ndaj shtetaseve E. L. dhe I. L., sepse nëpërmjet rrjeteve sociale dhe medias së shkruar, kanë përhapur informacione të rreme për shtetasen M. Q., me detyrë mjeke. Punohet për sqarimin e rrethanave të ngjarjes. Materialet i kaluan Prokurorisë së Rrethit Gjyqësor Tiranë, për veprime të mëtejshme.