Gjatë kësaj të së enjteje është zhvilluar mbledhja e parë e Gjykatës Kushtetuese. Pas bërjes funksionale të Gjykatës Kushtetuese, 7 anëtarët e saj janë mbledhur gjatë mëngjesit të sotëm, ku pritet që të zgjidhet edhe kryetari i ri i saj.
Gjithashtu ata pritet të diskutojnë edhe për çështjet që sipas ligjit i përkasin për kompetencë mbledhjes së gjyqtarëve, si dhe për të kryer veprimet e nevojshme përgatitore dhe organizative për funksionimin e gjykatës më të rëndësishme në vend.
Ndërkohë që ata do vendosin edhe për procedurat që ata do ndjekin për shqyrtimin e dosjeve, të cilat nuk janë trajtuar prej më shumë se dy vitesh. Pas kësaj mbledhjeje do të përcaktohen dhe dosjet e para që do të kalojnë në seancë.
Janë plot 140 dosje që 7 anëtarët e rinj te Gjykatës Kushtetuese do shqyrtojnë, por sipas informacioneve, mësohet se ata do të marrin në shqyrtim cështjet më të debatueshme dhe ato më sensitive. Ndër çështjet kryesore për të cilët gjyqtarët e gjykatës kushtetuese do shqyrtojnë janë zgjedhjet e 30 qershorit, e ankimuar nga kryebashkiakja e Shkodrës, Voltana Ademi, dosja e Teatrit e ankimuar nga presidenti Meta dhe artistët, Kodi Zgjedhor i ankimuar së fundmi nga opozita parlamentare. Gjithashtu, një tjetër temë është dhe sqarimi i kompetencave të Presidentit, i cili nuk pranoi të dekretonte emrin e ministrit Gent Cakaj.
Gjithashtu Gjykata Kushtetuese do shqyrtojë edhe përplasjet mes institucioneve, çështjet e pronave apo ato që kanë të bëjnë me vetë drejtësinë.
