Gazetarja Klodiana Lala, ka folur në lidhje me dorëheqjen e motrës Nuredin Dumanit nga Ministria e Jashtme, pas publikimit të lajmit në media për punësimin e saj në këtë institucion.
Lala u shpreh se ajo e ka refuzuar mbrojtjen që i ofron shteti, për shkak të dëshmive që i vëllai ka dhënë, duke bashkëpunuar me drejtësinë për zbardhjen e ngjarjeve kriminale.
Ajo theksoi se asaj sot i rrezikohet jeta nga grupet kriminale, ndërsa hodhi dyshimet se ajo mund të jetë lënë qëllimisht aty në mënyrë që Nuredin Dumani të jetë i shantazhueshëm për të ndërprerë dëshminë e tij.
“Motra e Nuredin Dumanit është 24-vjeç. Më tha që nuk e ka pranuar mbrojtjen. E kam takuar. Ajo mund të kishte zgjedhur të largohej. Ai ka edhe një tjetër vëlla të dënuar. Vëllai i tretë është larguar me status azilanti. Nëna dhe babai janë në Shqipëri, me statusin e të mbrojturit. Ajo ka të drejtën të konkurrojë. Ka të drejtën të punësohet.
Ku jemi ne? Drejtoria për sigurimin e informacionit të klasifikuar. Duhet të shikonte Xhuliana motra e kujt është. Ky informacion ka dalë nga vetë ministria e jashtme. Procedura duhet të ishte ndërprerë. Ajo vajzë është në një fazë depresioni. Sonte që flasim është e pambrojtur. Grupet kriminale mund ta marrin peng dhe mund ta shantazhojnë që i vëllai të tërhiqet.
Ka nevojë për një hetim penal. A është lënë qëllimisht ajo aty që nesër Nuredin Dumani të jetë i shantazhueshëm? Vajza më tha se për shkak se jam motra e Nuredin Dumanit nuk i kam prekur informacionet sekrete. Alarmi është te institucionet. Policia shqiptare nuk ka dalë me një deklaratë të sqarojë”, tha Lala.
