Mblidhet sot Këshilli Kombëtar i PD, pritet të votohen emrat e ri të ekipit të Bashës, personat që rikonfirmohen në detyrë (E PLOTË)
Sot më 30 gusht, Partia Demokratike do të mbledhë Këshillin Kombëtar ku në rend dite do të jenë katër pika kryesore, si Konstituimi i Këshillit të ri Kombëtar dhe zgjedhja e kryetarit të ri të saj.
Mbledhja do të nis sot në orën 18:00, ku do të përcaktohen edhe drejtuesit e ri të saj, emrat e disa prej të cilëve u bën me dije mbrëmjen e djeshme.
Mësohet se Basha do të rikonfirmojë Gazment Bardhin si Sekretar të Përgjithshëm të PD-së.
Nënkryetare të Partisë Demokratike do të jenë për herë të parë dy gra, Jorida Tabaku, e cila do të jetë përgjegjëse për marrëdhëniet me jashtë dhe Grida Duma, nënkryetare përgjegjëse për marrëdhëniet me shoqërinë civile.
Alfred Rushaj do të jetë nënkryetar i PD dhe kryetar i Grupit Parlamentar ndërsa Enkelejd Alibeaj, do të jetë kandidatura e PD për nënkryetar të Kuvendit, dhe njëkohësisht nënkryetar i PD, ndërsa Edi Paloka është kandidatura për kryetar të Këshillit Kombëtar, duke zëvendësuar Bujar Nishanin.
Flutura Açka është nominuar për një post të rëndësishëm, atë të Kryetares së Komisionit të Apelimit, Integritetit dhe Etikës., ndërsa Jemin Gjana do të vazhdojë si Kryetar i Komisionit Zgjedhor.
Për Sekretare për Pronarët dhe cështjet e pronave, Basha ka nominuar Ledina Mandian, ndërsa Jonila Godole do të jetë Sekretare për të Përndjekurit Politikë. Basha ka krijuar Sekretariatin për Klimën e Biznesit për të cilin është propozuar emri i Drejtuesit Politik të Qakut Kukës, dhe sipërmarrësit Flamur Hoxha.
Oriela Nebiaj, që kontributin e saj të parë në PD e ka dhënë si zëdhënëse, për të vijuar si kandidate për kryesimin e FRPD-së dhe së fundmi me rikthimin si kandidate për deputete në Tiranë, do të jetë Sekretare për Organizatat Partnere.
Për Sekretariatin e Burimeve Njerëzore dhe atë të Marrëdhënieve me Publikun janë nominuar dy zonja, Arta Sakja, dhe deputetja e Shkodrës Greta Bardeli. Në postin e Sekretarit Organizativ, është propozuar z. Ervin Minarolli, ndërkohë që Sekretar për Çështjet Ligjore dhe Zgjedhore, emri i propozuar është Ivi Kaso.
Pritet që sot këo emra të konfirmohen në detyrë, mbetet për tu parë nëse do të ketë ndryshime.
