Në një intervistë për Sky News, Presidenti i SHBA-ve, Donald Trump, ka komentuar armëpushimin dyjavor me Iran, duke e cilësuar atë si një zhvillim shumë pozitiv, por njëkohësisht ka paralajmëruar se konflikti mund të rifillojë menjëherë nëse marrëveshja dështon.
Trump deklaroi se SHBA ka arritur “gjithçka që synonte ushtarakisht” në Iran.
“Armëpushimi është i mrekullueshëm. Është shumë i mirë”, u shpreh ai, duke theksuar se, sipas tij, bëhet fjalë për “një fitore të plotë në aspektin ushtarak dhe në çdo aspekt tjetër”.
“Nëse nuk funksionon, rikthehemi menjëherë në luftë”
Megjithatë, presidenti amerikan la të hapur mundësinë e një përshkallëzimi të ri:
“Nëse nuk është i mirë, do të rikthehemi menjëherë, shumë lehtë”, paralajmëroi Trump, duke nënvizuar se opsioni ushtarak mbetet në tryezë.
Ai përsëriti se operacionet ushtarake kanë përmbushur objektivat e tyre:
“Kemi bërë gjithçka që donim të bënim nga pikëpamja ushtarake… një fitore e plotë.”
Ton më i moderuar se zakonisht
Korrespondenti i Sky News, vuri në dukje se kësaj radhe Trump u shfaq më i qetë dhe më i përmbajtur se zakonisht.
“Ai ishte optimist, i sjellshëm… madje më falënderoi që e telefonova. Nuk ishte Trump-i i zakonshëm me tone të forta që njohim”, raportoi gazetari.
“Një ditë e madhe për paqen botërore”
Më herët gjatë ditës, Trump e cilësoi zhvillimin si një moment historik për stabilitetin global.
“Një ditë e madhe për paqen botërore… kjo mund të jetë Epoka e Artë e Lindjes së Mesme!”, shkroi ai, duke shtuar se priten zhvillime pozitive dhe investime të mëdha.
Sipas tij, Iran mund të nisë tashmë procesin e rindërtimit.
Propozim për negociata
Presidenti amerikan bëri të ditur se kishte pranuar një propozim nga Pakistan, për një shtyrje dyjavore të afatit të vendosur ndaj Iranit.
Ai shtoi se Teheran ka paraqitur një plan me 10 pika në Washington, i cili mund të shërbejë si bazë për negociata për t’i dhënë fund konfliktit që ka destabilizuar Lindjen e Mesme.
