Degjenerimi i TCH, ‘ekzekuton’ ish-prokurorin vetëm për të ‘përfshirë’ Berishën
Çdo vit në ditën e ditëlindjes së themeluesit të Top Channel, kjo media i kushton një editorial krijuesit të saj Dritan Hoxha me të njëjtin slogan: Ëndrra vazhdon…
‘Ne vijojmë në gjurmët e ëndrrës së Tanit dhe krijimit të tij. Krijimit të një prone të publikut, të një hapësire të zërit dhe kërkesave të tyre. Kushtuar besueshmërisë së tyre dhe në respektit të emrit të Topit. Ne jemi sot zëri i shqiptarit të të gjitha trevave. E përfaqësues i interesit të kujtdo. Në politikë, investigim, kulturë e argëtim:, shkruhej në shkrimin e fundit me këtë rast.
Kushtuar besueshmërisë’…por cilës besueshmëri?!
Prej kohësh kjo media ka degjeneruar deri në atë pikë, sa jo vetëm nuk ka më shkëlqimin dhe besueshmërinë ‘e kohës së Tanit’, por është kthyer në një kamzhik dhe lëpirëse njëkohësisht të pushtetit të Edi Ramës.
Në këmbim të shndërrimit të drejtorit të saj të Përgjithshëm Ben Blushi në një biznesmen dhe përfitues të madh të koncesioneve e punëve të tjera, ky TV aktualisht është kthyer në një dritare denigruese deri në shpifje ndaj çdo kundërshtari politik të kryeministrit Edi Rama dhe pushtetit të tij.
Lajme, kronika e dokumentarë pafund të stisur me fakte e dëshmitarë të rremë që flasin kundër Sali Berishës dhe eksponentëve të tjerë politikë që denoncojnë Edi Ramën, i serviren publikut si gazetari.
Dhe këtë e bëjnë në një hapësirë e cila, ka edhe licencën e një Televizioni Kombëtarë!
Zelli i madh për të sajuar lajme që i shërbejnë pushtetit i çon shpesh herë deri në atë pikë, sa që të shpifin hapur dhe të prodhojnë disinformacione të frikshme.
Rasti më i fundit ishte pikërisht ditën e sotme.
Pas ngjarjes së rëndë të ndodhur mesditën e kësaj të premteje në një lokal pranë gjykatës së Tiranës ku mbeti i vrarë një person dhe u plagos avokati i tij Adriatik Cama, Top Channel vrapoi që ta politizonte dhe deformonte ngjarjen në mënyrë të turpshme dhe shokuese.
Ish-prokurorin Adriatik Cama i cili gjendej në skenën e krimit si avokat në një çështje divorci, e bënë të ekzekutuar me 5 plumba dhe arsyeja sipas TCH ishte hetimi që ka pas bërë ai, për ‘21 Janarin’ dhe çështjen ‘Santo’!
Pasi u sqaruan rrethanat kjo e ashtuquajtur media e madhe ‘e besueshme’ dhe ‘kombëtare’, në vend që të kërkonte falje të paktën për familjen dhe të njohurit e Adriatik Cama, korrigjoi lajmin për të vrarin, por nuk hoqi dorë nga lidhja me patjetër me ‘21 janarin’ dhe ‘Santon’.
Dikush në rrjet shkruante si diçiturë të këtyre lajmeve: Mungonte vetëm pjesa, Fajin e ka Saliu…
