Kryeministri Edi Rama ka komentuar skandalin me përdorimin e të dhënave të qytetarëve duke e paralelizuar situatën me aktivitetin e Partisë Demokratike. I ftuar në emisionin e Lutfi Dervishit në RTSh, Rama tha se në fakt është PD-ja ajo që po i pmend njerëzit.
Kreu i qeverisë shtoi se vetëm ditën e sotme të gjithë pjesëtarët e stafit të zyrave të tij ishin marrë në telefon nga selia blu.
“S’ka lidhje me AKSH! Çfarë duhet të themi me PD që me “call-centerat” e Agron Shehajt e çmendi këtë milet me telefonata. Sot në zyrrë, të gjithë njerëzit e zyrës ishin marrë në teledon nga PD. Kanë të gjitha databazat dhe e çmendën miletin në telefon. Të gjitha partitë e bëjnë këtë, kudo në botë. Jo vetëm këtu. Ai ekseli është shumë i vjetër për të qenë i PS-së,”- tha Rama.
Por çfarë ka ndodhur me të dhënat personale të qytetarëve?
Skandali është zbuluar dy ditë më parë nga Lapsi.al. Një database me të dhënat e mbi 910 mijë votuesve, përfshirë këtu një sërë emrash të njohur të gazetarëve si Blendi Fevziu, Ylli Rakipi, Mero Baze, Fatos Lubonja, Andi Bushati, Armand Shkullaku, Arjan Cani e Eni Vasili, janë të skeduar me preferencat politike dhe shanset se për kë do të votojnë me 25 prill. Sipas portalit, ky regjistër elektronik është shpërndarë në të gjitha degët e PS në Shqipëri dhe të dhënat janë marrë nga e-albania. Në një reagim, AKSHI mohoi të ketë gisht në këtë database, ndërsa Taulant Balla tha se PS ka regjistra prej vitesh.
