Flet Olsi Çukaj, zëvendëspresident i “BOLV Group”
“BOLV Group”, që aktualisht ka një marrëveshje aktive me “Accor” për hapjen e një hoteli nën markën “Novotel”, mbetet i angazhuar për ta çuar këtë projekt drejt finalizimit, edhe pse pjesa më intensive e punës qëlloi në një moment të vështirë si pandemia.
Olsi Çukaj, zëvendëspresident i “BOLV Group”, sqaron se në funksion të përshtatjes me kushtet e reja të tregut, grupi ka ndryshuar strategjinë.
Lidhur me kapacitetet në rritje, gjithmonë e më shumë në kryeqytet, nën emra të ndryshëm markash hoteliere, z. Çukaj shprehet se, nëse punohet me një strategji të qartë promovimi për Shqipërinë, për ta bërë atë tërheqëse gjatë gjithë vitit për të huajt, tregu nuk do të ketë probleme.
“BOLV Oil Group” njoftoi, më pak se dy vite më parë, se do të sillte në Shqipëri një nga markat ndërkombëtare të akomodimit, “Novotel”, pjesë e bashkëpunimit me “Accor”. Në çfarë faze është ky investim?
“BOLV Group” është ende në fazë zhvillimi të projektit dhe po ecën me hapa të ngadaltë, por të sigurt. Kjo sepse vijmë pas një periudhe pandemie globale dhe ekonomia si kudo në botë, ashtu dhe në Shqipëri, pësoi goditje.
Vlen të theksojmë që grupi ynë i rezistoi kësaj vale krize dhe vijon të mbetet i qartë në objektivin e tij, në përfundimin e projektit të “Hotel Novotel”, sigurisht duke përmirësuar strategjinë në përshtatje me kushtet e reja.
“Novotel”, si brand, karakterizohet nga detaje të rëndësishme, si në tipologji hoteli (business) dhe design, kështu që po vlerësojmë me seriozitet këtë aspekt, duke pasur si dëshirë që në fund të kemi një ndërtesë/projekt/hotel me standarde të larta, si nga ana arkitekturore edhe nga ajo e hotelerisë funksionale.
Konkretisht, si ndikoi pandemia në planet tuaja të zbatimit të projektit?
Siç e përmenda dhe më sipër, pandemia dha efektet e saj në ngadalësimin e ritmit të zbatimit. Hapja e hotelit ishte parashikuar në fund të këtij viti (2022) por na u desh që të ulemi dhe të bisedojmë me partnerët tanë të “Accor” e ta shtyjmë për më vonë fillimin e shërbimit në ambientet e punës.
Tirana ka vazhduar të ketë hapje të strukturave akomoduese “brand” ndërkombëtar, duke rritur ndjeshëm numrin e tyre. A mendoni se ka treg për të gjithë, apo mund të kemi një mbingopje të tregut?
Është e vërtetë që në Tiranë po hyjnë me vrull disa marka hotelesh të njohura ndërkombëtare. Ky është një lajm i mirë për ekonominë shqiptare, për turizmin, por edhe për tregun e punës.
Kjo mendoj se do t’i shërbejë kulturës së punës dhe në veçanti, industrisë së shërbimit. (hospitality / mikpritje / horeca / hoteleri), që mendoj se ka nevojë për përmirësime rrënjësore.
Lidhur me rritjen e kapaciteteve, mendoj se ka treg për të gjithë, vetëm nëse Shqipëria bëhet e pëlqyeshme nga tregu ndërkombëtar, që do të thotë që të huajt të kenë arsye të forta të vijnë në Shqipëri.
Në këtë kontekst, mendoj se duhet të punohet për të zhvilluar elemente të tjera, në funksion të kthimit të Shqipërisë në një destinacion tërheqës, gjë që nënkupton se duhet të promovohet dhe lobohet për organizime të ndryshme eventesh të lidhura me artin, kulturën, sportin, konferenca ndërkombëtare.
Rolin kyç në këtë aspekt mendoj se duhet ta luajë shteti, duke zhvilluar qartë strategji, të cilat kanë në thelb rritjen e interesit të të huajve drejt Shqipërisë në harkun gjithëvjetor.
A keni nisur me gjetjen e stafit dhe sa e lehtë apo e vështirë duket kjo, po të kemi parasysh që sektori i akomodimit po raporton vështirësi të vazhdueshme në gjetjen e punonjësve dhe një pjesë po mendojnë edhe alternativën e forcës së punës nga jashtë?
Kjo ka qenë dhe mbetet sfidë e vërtetë për industrinë e shërbimeve. Besoj se do të jetë në të ardhmen edhe më e vështirë. Të tilla sipërmarrje kërkojnë një përqindje të konsiderueshme të stafit të kualifikuar.
Të jemi realistë, në Shqipëri janë një numër shumë i vogël i stafit menaxherial/senior që mund të përshtaten më lehtë me sistemet e organizimit të punës nga brand/grupe që po hapen në vend. Ne si grup kemi një strategji në identifikimin e një stafi të kualifikuar dhe çdo ditë punojmë për gjetjen dhe krijimin e kanaleve të komunikimit me ta.
Nuk e përjashtoj alternativën e forcës së punës nga jashtë, por jam mbështetës i përfshirjes së forcës punëtore vendase në maksimumin e saj e më pas të mendojmë të importojmë staf të jashtëm.