Ekspertja e Institutit të Shëndetit Publik, Silva Bino ka shpjeguar me detaje se si do të lajmërohen qytetarët për të bërë vaksinën anti-COVID. Në një intervistë për A2, Bino tha se mjeku i familjes do të ketë një rol shumë të rëndësishëm, ku do të jetë ai që do të bëjë njoftimin e qytetarit. Plani i vaksinimit mund të zhvillohet tek ambulanca e lagjes.
“Kemi një plan kombëtar vaksinimi dhe një plan të përgatitur me numra përkatës, të personelit shëndetësor, të moshuarve, personave me probleme shëndetësore etj. Të gjitha numrat janë të gatshme në planin kombëtar të vaksinimit. Në bazë të numrave kemi dhe mikroplanin për çdo bashki. Plani i vaksinimit mund të zhvillohet tek ambulanca e lagjes, në një qendër komunitare. Një qytetar do të lajmërohet nga mjeku i familjes kur t’i vijë radha për t’u vaksinuar”, tha Bino.
Procesi i vaksinimit ka vijuar sot në dy qendrat e vaksinimit në Tiranë dhe Shkodër si dhe në Shtëpitë e të Moshuarve. Gjatë ditës së sotme janë kryer 612 vaksinime anti-COVID për personelin shëndetësor dhe në shtëpitë e të moshuarve. Që nga fillimi i vaksinimit, e kanë marrë dozën e parë të vaksinës 1693 persona, 620 mjekë dhe infermierë kanë marrë dozën e dytë dhe në total janë kryer 2313 vaksina antiv-COVID.
