Bashkim Ulaj e nis vitin me 741 000 Euro tender; gjoja do çojë në landfillin e Tiranës, 69 mijë m3 mbetje inerte të Durrësit
Përveç 350 milionë Euro rindërtim banesash, shqiptarët po paguajnë miliarda lekë taksa dhe për pastrimin e gërmadhave, që shkaktuan lejet e Vangjush Dakos dhe kullat e pasigurta, të ngritura nga oligarkë e deputetë biznesmenë ndërtimi, 3 kulla nga të cilat, ishin të Sadri Abazit.
Para 24 orësh, Bashkia e Durrësit, njoftoi në një Buletin të Posaçëm të APP-së me nr. 1 datë 5 janar 2021, se në tenderin për evadimin e gërmadhave të pallateve që rrëzoi tërmeti, kishte përzgjedhur firmën “4-AM shpk”.
Kjo firmë është biznes faktik i oligarkut Bashkim Ulaj, futur në “tepsi” me këtë logo, pas skandalit me tenderin e Unazës së Re dhe OST, duke fituar afro 30% të tenderëve e PPP-ve nëpër ministri, ente publike e bashki.
Sipas informacionit nga Bashkia Durrës, tenderi nuk është bërë fare, por vetëm është hartuar e shpallur njoftimi me fituese firmën “4 AM”; ndërkohë që firma garuese fiktive Biba, ortake e Bashkim Ulajt në shumë tendera të tjerë, nuk është paraqitur.
Tenderi me vlerë kontrate 74 milionë, 107 mijë e 360 lekë të reja pa TVSH; ishte sajuar qysh më 30 nëntor 2020 dhe ishte paracaktuar t’i jepej firmës “4-AM shpk”; pazar që provohet nga fakti, se kjo firmë ka nisur evadimin e mbetjeve inerte, qysh 15 ditë para datës së zhvillimit të tenderit.
Këto miliona, do paguhen nga taksat publike në zërin “Fond Rindërtimi”; ndërkohë që me Urdhër nr. 32/1, datë 4 dhjetor 2019 të kryeministrit Rama, mbetjet do evadoheshin nga firmat që kanë ndërtuar pallatet e shkatërruara nga tërmeti.
Akoma më skandaloz është fakti, se përveç kostos së gjoja transportit 740 mijë Euro, që do t’i jepen oligarkut Bashkim Ulaj; Bashkia Durrës do t’i paguajë 29 Euro/ton edhe oligarkëve Klodian Zoto e Klodian Mërtiri, për gjoja depozitimin e mbetjeve në Landfillin-Sharrë; ndërkohë që për mbetjet Tiranë-Durrës, shteti ka akorduar 180 milionë Euro PPP./Pamfleti
