Nga Vladimir Selamaj:
Letër e Hapur Drejtuar z. Ardian Daullja, Kryetar i Asamblesë së Diasporës Shqiptare në Greqi!
****************************
I nderuar z. Ardian Daullja,
Po ju drejtohem publikisht me këtë letër të hapur, nisur nga zhvillimet që kanë pasuar zgjedhjet e Asamblesë së Diasporës Shqiptare në Greqi, të mbajtura më 29 mars 2026.
Së pari, dëshiroj të vlerësoj faktin se, pas më shumë se dy vitesh pritjeje, u arrit të organizoheshin zgjedhjet sipas statutit në fuqi. Kjo përbën një hap pozitiv për përfaqësimin dhe organizimin e komunitetit shqiptar në Greqi, i cili prej vitesh ka nevojë për institucione funksionale dhe përfaqësim serioz.
Personalisht i ndoqa nga afër këto zgjedhje. Ndonëse u vunë re disa mangësi procedurale dhe teknike, të cilat mund të justifikohen pjesërisht nga vështirësitë organizative dhe karakteri i ri i procesit, përsëri mbetet fakti se komuniteti shqiptar priste më shumë transparencë dhe komunikim publik.
Gjatë zhvillimit të zgjedhjeve më bëri përshtypje një element që nuk u sqarua asnjëherë. Kandidatët e zgjedhur në Kryesi, si dhe më pas kandidati i zgjedhur për Kryetar, nuk u prezantuan publikisht me biografitë, formimin arsimor, përvojën profesionale dhe vizionin e tyre për drejtimin e institucionit. Kjo mungesë transparence lë vend për pikëpyetje dhe nuk ndihmon në krijimin e besimit te komuniteti që ata janë thirrur të përfaqësojnë.
I nderuar z. Daullja,
Kanë kaluar më shumë se dy muaj nga zgjedhja e Kryesisë dhe, fatkeqësisht, shumica e shqiptarëve në Greqi ende nuk dinë se cili është programi i saj, cilat janë prioritetet, objektivat dhe planet konkrete për mbrojtjen e interesave të diasporës shqiptare.
Deri më sot, i vetmi aktivitet që është bërë publik ka qenë takimi i Kryetarit z. Etmond Guri me Ministrin grek të Migracionit. Çdo kontakt institucional është i mirëpritur, por komuniteti pret më shumë se sa fotografi dhe njoftime ceremoniale. Ai pret rezultate konkrete, iniciativa, projekte dhe angazhim të vazhdueshëm për çështjet që prekin shqiptarët në Greqi.
Në reagimet e mia publike lidhur me këtë apati të Kryesisë së zgjedhur, kam hasur jo pak sulme personale dhe ofendime. Ajo që më ka habitur më shumë është fakti se, në vend të debatit qytetar dhe argumenteve, disa individë kanë zgjedhur të përmendin Kanunin, traditat krahinore apo koncepte të vjetra që nuk kanë asnjë lidhje me funksionimin e një organizate moderne në një shtet demokratik.
Kjo tregon se ende kemi rrugë të gjatë për të bërë në kulturën tonë demokratike. Kritika nuk duhet parë si sulm, por si një mjet për të përmirësuar punën e institucioneve dhe për të kërkuar llogaridhënie nga ata që marrin përsipër përgjegjësi publike.
Asambleja e Diasporës nuk është pronë e askujt dhe as forum që duhet vetëm të lavdërohet. Ajo është një institucion përfaqësues i komunitetit shqiptar dhe, si i tillë, duhet të jetë i hapur ndaj pyetjeve, kritikave dhe sugjerimeve.
Pikërisht për këtë arsye, ju drejtoj disa pyetje publike:
-Cili është programi konkret i Kryesisë për vitin 2026?
-Cilat janë prioritetet kryesore në raport me komunitetin shqiptar në Greqi?
-A do të publikohen biografitë dhe CV-të e anëtarëve të Kryesisë?
-A do të ketë raportime periodike mbi aktivitetet dhe rezultatet e punës së Asamblesë?
Si do të përfshihen shoqatat, aktivistët dhe individët e angazhuar në jetën e komunitetit shqiptar?
Besoj se përgjigjja ndaj këtyre pyetjeve do të ndihmonte në forcimin e besimit të komunitetit dhe do të demonstronte se Asambleja e Diasporës është një institucion që funksionon me transparencë, përgjegjshmëri dhe respekt ndaj shqiptarëve që përfaqëson.
Në fund, dëshiroj të theksoj se kjo letër nuk ka si qëllim të sulmojë askënd personalisht. Përkundrazi, ajo synon të nxisë dialog, transparencë dhe përgjegjësi publike. Komuniteti shqiptar në Greqi meriton një përfaqësim aktiv, dinjitoz dhe efektiv.
Me respekt
Vladimir Selamaj
Athinë
5-06-2026
