Arratisja e BUJSHME nga tarraca e burgut! Arrestohet SHEFI i ‘Ngrangheta-s në Brazil, Rocco Morabito kapet në hotel bashkë me një tjetër trafikant
Rocco Morabito, ‘SHEFI’ i klanit ‘Ndrangheta që kërkohej nga drejtësia italiane është vënë në pranga në Brazil. Mësohet se Morabito është arrestuar në veri të Brazilit, në një hotel në Joao Pessoa, si pasojë e një operacioni të organizuar nga karabinierët e ROS, Shërbimi Ndërkombëtar Policor, në bashkëpunim me DEA, FBI dhe Departamentit të Drejtësisë të SHBA.
‘Bosi’ ishte në listën e dhjetë kriminelëve më të kërkuar në botë dhe ishte në kërkim që nga viti 2019, kur ai u arratis nga një burg në Uruguai, teksa priste të ekstradohej. Bashkë me Rocco Morabito, u vu në pranga edhe trafikanti i drogës në Torino, Vincenzo Pasquino, tridhjetë vjeç i shpallur në kërkim që nga nëntori i vitit 2019, gjithashtu i përfshirë në listat e të arratisurve me rrezik maksimal.
Morabito është dënuar në mungesë nga drejtësia italiane me 30 vjet burg për trafik droge. Ai u vu në pranga në vitin 2017 në Uruguai, pasi u zbulua se fshihej pas identitetit të rremë të një biznesmeni 49-vjeçar brazilian me emrin Francisco Cappelletto dhe po priste të transferohej pasi drejtësia lokale kishte dhënë leje për ekstradimin e tij në Mars 2019. Por, krejt papritur, ai u arratis përmes tarracës së burgut.
