Kreu i ri i SPAK, Klodian Braho, u ka kërkuar prokurorëve të posaçëm intensifikim të hetimeve dhe rezultate konkrete me dosjet e mbartura, të cilat kanë krijuar një “backlog” çështjesh të patrajtuara prej kohësh.
Nga studio e emisionit “Top Story”, analisti Arjan Curri hodhi një deklaratë të fortë, duke paralajmëruar se në ditët në vijim priten zhvillime të rëndësishme. Sipas informacioneve që ai disponon, SPAK është gati të lëshojë fletë-arreste për disa drejtues të lartë të Policisë, të dyshuar për përfshirje në grupe kriminale ose për tolerim të narkotrafikut.
“Narkotrafiku nuk ndodh vetvetiu. Në Shqipëri ai zhvillohet edhe me tolerim institucional. Në ditët në vijim SPAK ka gati fletë-arreste për drejtues të lartë të policisë, për të cilët është faktuar lidhja me krimin,” deklaroi Curri.
Sipas tij, hetimet kanë dokumentuar rolin e disa zyrtarëve të lartë në lehtësimin ose mbulimin e veprimtarisë kriminale, ndërsa pritet që veprimet procedurale të ndërmerren shumë shpejt.
Deklarata ka shtuar pritshmëritë për një fazë të re goditjesh ndaj korrupsionit dhe lidhjeve të krimit me strukturat shtetërore.
